Devdutt Padikkal: 11 ఏళ్ల తర్వాత... రంజీ ట్రోఫీ ఫైనల్లోకి దూసుకెళ్లిన కర్ణాటక

11 ఏళ్ల సుదీర్ఘ నిరీక్షణకు తెరదించుతూ కర్ణాటక జట్టు రంజీ ట్రోఫీ ఫైనల్‌కు అర్హత సాధించింది. 2014-15 సీజన్ తర్వాత మళ్లీ ఇప్పుడే ఫైనల్లో అడుగుపెట్టింది. దేవదత్ పడిక్కల్ సారథ్యంలోని కర్ణాటక, ఉత్తరాఖండ్‌తో జరిగిన సెమీఫైనల్ మ్యాచ్‌లో తొలి ఇన్నింగ్స్ ఆధిక్యం ఆధారంగా ఫైనల్ బెర్త్‌ను ఖరారు చేసుకుంది.

బెంగాల్‌పై గెలిచి చరిత్రలో తొలిసారి ఫైనల్ చేరిన జమ్మూ కశ్మీర్‌తో కర్ణాటక టైటిల్ కోసం తలపడనుంది. ఫైనల్ మ్యాచ్ వేదికను బీసీసీఐ ఇంకా అధికారికంగా ప్రకటించలేదు. అయితే, ఈ ప్రతిష్ఠాత్మక మ్యాచ్‌కు హుబ్లీలోని కేఎస్‌సీఏ రాజ్‌నగర్ స్టేడియం ఆతిథ్యం ఇచ్చే అవకాశాలు ఉన్నాయని విశ్వసనీయ వర్గాలు తెలిపాయి.

ఇక సెమీఫైనల్ మ్యాచ్ విషయానికొస్తే, టాస్ ఓడి మొదట బ్యాటింగ్ చేసిన కర్ణాటక, తొలి ఇన్నింగ్స్‌లో 736 పరుగుల భారీ స్కోరు సాధించింది. కెప్టెన్ దేవదత్ పడిక్కల్ (232) డబుల్ సెంచరీతో చెలరేగగా, ఫామ్‌లో ఉన్న ఓపెనర్ కేఎల్ రాహుల్ (141), స్మరణ్ రవిచంద్రన్ (135) సెంచరీలతో రాణించారు.

అనంతరం బ్యాటింగ్ చేసిన ఉత్తరాఖండ్‌ను కర్ణాటక బౌలర్లు 233 పరుగులకే కట్టడి చేశారు. దీంతో కర్ణాటకకు 503 పరుగుల కీలక ఆధిక్యం లభించింది. విద్యాధర్ పాటిల్, విజయ్‌కుమార్ వైశాఖ్ చెరో మూడు వికెట్లు పడగొట్టారు. రెండో ఇన్నింగ్స్‌లో కర్ణాటక 323 పరుగులు చేసి, ఉత్తరాఖండ్‌కు 827 పరుగుల అసాధ్యమైన లక్ష్యాన్ని నిర్దేశించింది. చివరి రోజు ఆట ముగిసే సమయానికి ఉత్తరాఖండ్ 6 వికెట్లకు 260 పరుగులు చేయగా, ఇరు జట్ల కెప్టెన్ల అంగీకారంతో మ్యాచ్‌ను డ్రాగా ప్రకటించారు. దీంతో తొలి ఇన్నింగ్స్ ఆధిక్యంతో కర్ణాటక ఫైనల్‌కు దూసుకెళ్లింది.