Minor Girl: మాజీ ప్రియుడిపై మైనర్ బాలిక ప్రతీకారం... బట్టలిప్పి మరీ కొట్టారు!

ప్రేమ విఫలమవ్వడంతో, మాజీ ప్రియురాలి పాత ప్రేమ వ్యవహారాలను ఆమె కుటుంబ సభ్యులకు చెబుతానని బెదిరించిన ఓ యువకుడిని కిడ్నాప్ చేసి, నగ్నంగా మార్చి దారుణంగా దాడి చేసిన ఘటన బెంగళూరులో కలకలం రేపింది. ఈ దారుణానికి పాల్పడిన ఎనిమిది మందిని పోలీసులు అరెస్ట్ చేశారు. ఈ ఘటన జూన్ 30న నగర శివార్లలోని సోలదేవనహళ్లి పరిధిలోని హేసరఘట్టలో చోటుచేసుకుంది. ఈ కేసులో నిందితురాలిగా ఉన్న 17 ఏళ్ల మైనర్ బాలికను అధికారులు మహిళా సంరక్షణ కేంద్రానికి తరలించారు.

పోలీసుల ప్రాథమిక విచారణ ప్రకారం, బాధితుడు, మైనర్ బాలిక గతంలో ప్రేమించుకున్నారు. కొన్ని నెలల క్రితం వ్యక్తిగత కారణాలతో వారిద్దరూ విడిపోయారు. అనంతరం ఆ బాలిక మరో యువకుడితో సన్నిహితంగా ఉండటం ప్రారంభించింది. ఈ విషయం తెలుసుకున్న మాజీ ప్రియుడు, ఆ బాలికకు ఫోన్ చేసి నిలదీశాడు. ప్రేమ వ్యవహారాలు పెట్టుకుని, మధ్యలోనే వదిలేయడం ఆమెకు అలవాటుగా మారిందని, ఈ విషయం ఆమె కుటుంబ సభ్యులకు చెబుతానని బెదిరించాడు.

ఈ బెదిరింపుల విషయాన్ని ఆ బాలిక తన కొత్త ప్రియుడికి చెప్పింది. దీంతో ఆగ్రహానికి గురైన అతను, తన స్నేహితులతో కలిసి ప్రతీకారం తీర్చుకోవాలని నిర్ణయించుకున్నాడు. పథకం ప్రకారం, ఆ బాలిక సహాయంతోనే మాజీ ప్రియుడిని కిడ్నాప్ చేశారు. అనంతరం అతడిని హేసరఘట్ట సమీపంలోని ఓ నిర్మానుష్య ప్రదేశానికి తీసుకెళ్లారు. అక్కడ బాధితుడి బట్టలు విప్పించి, నగ్నంగా మార్చి బెత్తాలతో తీవ్రంగా కొట్టారు. ఈ దాడిలో యువకుడు తీవ్రంగా గాయపడ్డాడు. బాధితుడి ఫిర్యాదు మేరకు రంగంలోకి దిగిన పోలీసులు, మైనర్ బాలికతో సహా ఎనిమిది మంది నిందితులను అరెస్ట్ చేసి విచారణ చేపట్టారు.

ఈ ఘటన గతేడాది సినీ నటుడు దర్శన్ కేసును గుర్తుకు తెస్తోంది. తన స్నేహితురాలు పవిత్ర గౌడ గురించి సోషల్ మీడియాలో అసభ్యకర పోస్టులు పెట్టాడనే ఆరోపణలతో రేణుకాస్వామి అనే వ్యక్తిని కిడ్నాప్ చేసి, చిత్రహింసలకు గురిచేసి హత్య చేశారు. ఈ కేసులో నటుడు దర్శన్, పవిత్ర గౌడ సహా 17 మందిని పోలీసులు అరెస్ట్ చేసిన విషయం తెలిసిందే. ఇప్పుడు అదే తరహాలో బెదిరింపులకు పాల్పడిన యువకుడిపై దాడి జరగడం నగరంలో చర్చనీయాంశంగా మారింది.