బాలీవుడ్ లో తనకు పోటీ ఎవరనే దానిపై కత్రినా కైఫ్ స్పందన

బాలీవుడ్ అగ్ర కథానాయికగా కత్రినాకైఫ్ గుర్తింపు పొందారు. చిత్రరంగంలోకి ఆమె అడుగుపెట్టి నిన్నటితో 20 ఏళ్లు పూర్తయింది. ఈ 20 ఏళ్లలో ఆమె ఎన్నో విజయవంతమైన చిత్రాల్లో నటించారు. తాజాగా ఆమె నటించిన 'టైగర్ 3' చిత్రం ఘన విజయం సాధించింది. ఈ సందర్భంగా కత్రినా సోషల్ మీడియా ద్వారా అభిమానులతో ముచ్చటించారు. 

తన సుదీర్ఘమైన కెరీర్ లో సాధించిన విజయాల పట్ల ఎంతో సంతోషంగా ఉన్నానని ఈ సందర్భంగా ఆమె చెప్పారు. ఇండస్ట్రీలోకి వచ్చేటప్పుడు తాను ఏం కోరుకున్నానో దాన్ని సాధించానని తెలిపారు. ప్రతి చిత్రంలో కొత్త విషయాలను నేర్చుకుంటూ నటిగా పరిణతి సాధించానని చెప్పారు. తన ప్రయాణం ఒక కలలా గడిచిపోయిందని అన్నారు. తన కెరీర్ లో ఎన్నో మధుర జ్ఞాపకాలు ఉన్నాయని చెప్పారు. ఇండస్ట్రీలో పోటీ ఉంటుందని, అయితే ఆ పోటీ గురించి తాను ఎప్పుడూ పట్టించుకోలేదని... తనకు తానే పోటీ అని అన్నారు. భవిష్యత్ లో ఛాలెంజింగ్ రోల్స్ ను చేయడానికి రెడీగా ఉన్నానని చెప్పారు.