జీవితం అనంతమైన అవకాశాలతో నిండివుండి.. ఆనంద్ మహీంద్రా వీడియో వైరల్

సోషల్ మీడియాలో చురుగ్గా ఉండే వ్యాపారవేత్తల్లో ఆనంద్ మహీంద్రా ఒకరు. నిత్యం స్ఫూర్తిదాయక వీడియోలను అభిమానులతో పంచుకునే ఆయన తాజాగా షేర్ చేసిన వీడియో నెట్టింట వైరల్ అవుతోంది. ఓ స్టీమ్ రోలర్‌ను పడవలోకి ఎక్కిస్తున్న వీడియో ఇది. ఒడ్డు నుంచి రెండు చెక్కల సాయంతో కొందరు వ్యక్తులు ఆ రోలర్‌ను పడవలోకి ఎక్కిస్తున్నారు. రోలర్‌పై ఉన్న వ్యక్తి దానిని ఆపరేట్ చేస్తున్నాడు. రోలర్ దాదాపు పడవలోకి ఎక్కేసిందని అనుకున్న వేళ పడవ ఒక్కసారిగా ఊగిపోయింది. ఈ క్రమంలో రోలర్‌ను పూర్తిగా ఎక్కించేందుకు చేసే ప్రయత్నాలు ఫలించకపోవడంతో ఆ వ్యక్తి నీటిలోకి దూకేశాడు. ఆ వెంటనే రోలర్ కూడా నీటిలో పడిపోయింది. అయితే, ఇది ఎక్కడ జరిగిందన్నది తెలియరాలేదు.

ఇది చూసిన నెటిజన్లు ఆందోళన వ్యక్తం చేస్తున్నారు. నీటిలోకి దూకిన వ్యక్తిపైనే రోలర్ పడడంతో అతడి గురించి నెటిజన్లు ఆరా తీస్తున్నారు. ఈ వీడియోను షేర్ చేసిన ఆనంద్ మహీంద్రా.. ఇది బహుశా ఇండియాలోనే జరిగి ఉంటుందని పేర్కొన్నారు. జీవితం అనంతమైన అవకాశాలతో నిండి ఉందని మనం విశ్వసిస్తామని.. తాను చెప్పే ఏకైక రక్షణ అదేనంటూ పరోక్షంగా ఇలాంటి సాహసాలు చేయొద్దని హెచ్చరికలు జారీ చేశారు.