ఇలా థియేటర్స్ కీ .. అలా నెట్ ఫ్లిక్స్ ఫ్లాట్ ఫామ్ పైకి 'నాయకుడు'

ఈ మధ్య కాలంలో తమిళనాట విడుదలైన సినిమాలలో కంటెంట్ పరంగా మంచి మార్కులను దక్కించుకున్న సినిమాలలో 'మామన్నన్' ఒకటిగా కనిపిస్తుంది. ఉదయనిధి స్టాలిన్ .. కీర్తి సురేశ్ .. వడివేలు .. ఫహాద్ ఫాజిల్ ప్రధానమైన పాత్రలను పోషించిన ఈ సినిమా, క్రితం నెల 29వ తేదీన అక్కడి థియేటర్లకు వచ్చింది. 

మారి సెల్వరాజ్ దర్శకత్వం వహించిన ఈ సినిమా, 'నాయకుడు' టైటిల్ తో ఈ నెల 14వ తేదీన ఇక్కడి థియేటర్లకు వచ్చింది. సహజత్వానికి చాలా దగ్గరగా నడిచిన ఈ కథ తమిళనాట ప్రశంసలను అందుకోగా, తెలుగులో పబ్లిసిటీ కూడా పెద్దగా లేక డీలాపడిపోయింది. ఈ సినిమాను ఎవరూ కూడా అంతగా పట్టించుకోలేదు. 

అలాంటి ఈ సినిమా ఈ నెల 27వ తేదీ నుంచి తమిళ .. తెలుగు .. మలయాళ ... కన్నడ భాషల్లో 'నెట్ ఫ్లిక్స్' లో స్ట్రీమింగ్ కానుంది. ఈ విషయాన్ని అధికారికంగా తెలియజేస్తూ, పోస్టర్ ను కూడా వదిలారు. తెలుగు థియేటర్స్ కి వచ్చిన రెండు వారాల్లోనే ఈ సినిమా ఓటీటీ ద్వారా పలకరించనుందన్న మాట. కంటెంట్ పరంగా చూసుకుంటే, ఓటీటీ ద్వారా కూడా ఈ సినిమాకి మంచి రెస్పాన్స్ వచ్చే అవకాశాలు ఉన్నాయి.