Chandrababu: గుడివాడలో చంద్రబాబు రోడ్ షో... శరత్ థియేటర్ వద్ద ఉద్రిక్తత

ఉమ్మడి కృష్ణా జిల్లాలో టీడీపీ అధినేత చంద్రబాబు పర్యటన కొనసాగుతోంది. ఇదేం ఖర్మ మన రాష్ట్రానికి కార్యక్రమంలో భాగంగా, చంద్రబాబు రోడ్ షో నిమ్మకూరు నుంచి గుడివాడ చేరుకుంది. ఈ నేపథ్యంలో, గుడివాడ శరత్ థియేటర్ వద్ద ఉద్రిక్తత ఏర్పడింది. చంద్రబాబు రోడ్ షో వైసీపీ కార్యాలయం మీదుగా వెళ్లాల్సి ఉండగా, వైసీపీ కార్యకర్తలు అక్కడికి భారీగా చేరుకున్నారు. వైసీపీ జెండాలు ప్రదర్శిస్తూ నినాదాలు చేశారు. 

ఈ సందర్భంగా టీడీపీ, వైసీపీ శ్రేణుల మధ్య ఉద్రిక్తత నెలకొంది. ఓ దశలో ఇరువర్గాల మధ్య బాహాబాహీ చోటుచేసుకుంది. ఈ నేపథ్యంలో, భారీగా పోలీసులను మోహరించారు. పరిస్థితి అదుపుతప్పకుండా పోలీసులు పరిస్థితిని సమీక్షిస్తున్నారు. 

అంతకుముందు, గుడివాడ నియోజకవర్గంలో చంద్రబాబుకు ఘనస్వాగతం లభించింది. రామనపూడి వద్ద గుడివాడ నియోజకవర్గంలోకి చంద్రబాబు రోడ్ షో ప్రవేశించింది. నియోజకవర్గ సరిహద్దుల వద్ద చంద్రబాబుకు రావి వెంకటేశ్వరరావు, వెనిగండ్ల రాము స్వాగతం పలికారు. ఈ సందర్భంగా భారీ స్థాయిలో బైక్ ర్యాలీ చేపట్టారు. 

ఈ రాత్రికి చంద్రబాబు గుడివాడ జనార్దనపురంలోని వీకేఆర్ కళాశాల ప్రాంగణంలో నిర్వహించనున్న సభలో పాల్గొంటారు. గుడివాడలో ఉద్రిక్త పరిస్థితుల నేపథ్యంలో చంద్రబాబుకు భద్రతగా ఎన్ఎస్ జీ అదనపు బలగాలు రంగంలోకి దిగాయి.