Junior NTR: తెలుగు రాష్ట్రాల్లో 'ఆర్ ఆర్ ఆర్' రీ రిలీజ్!

రాజమౌళి దర్శకత్వంలో రూపొందిన 'ఆర్ ఆర్ ఆర్' ప్రపంచవ్యాప్తంగా ప్రేక్షకుల ఆదరణ పొందింది. వసూళ్ల విషయంలో కొత్త రికార్డులను సృష్టించింది. 'ఆస్కార్' కి సంబంధించిన వేడుకల్లో ఈ సినిమాను గురించిన ప్రశంసలు వినిపిస్తున్నాయి. రాజమౌళి .. ఎన్టీఆర్ .. చరణ్ అంతా కూడా ప్రస్తుతం అమెరికాలోనే ఉన్నారు. 
 
ఈ సినిమాకి దక్కిన గౌరవం గురించే అంతా చర్చించుకుంటున్న ఈ సమయంలో, ఈ సినిమాను మరోసారి రిలీజ్ చేయడానికి ఏర్పాట్లు జరిగిపోయాయి. ఈ నెల 10వ తేదీన రెండు తెలుగు రాష్ట్రాల్లో ఈ సినిమాను రీ రిలీజ్ చేస్తున్నారు. ఈ విషయాన్ని తెలియజేస్తూ అందుకు సంబంధించిన అధికారిక పోస్టర్ ను కొంతసేపటి క్రితం రిలీజ్ చేశారు.     

 అల్లూరి - కొమరమ్ భీమ్ ల ఆశయాన్ని .. దేశం కోసం వారు చేసిన త్యాగాన్ని ఆవిష్కరించిన సినిమా ఇది. కథాకథనాల పరంగా .. చిత్రీకరణ పరంగా .. పాటల పరంగా .. బ్యాక్ గ్రౌండ్ స్కోర్ పరంగా .. కెమెరా పనితనం పరంగా ఈ సినిమా ఒక అద్భుతమైన దృశ్యరూపంగా నిలిచింది. అలాంటి ఈ సినిమా, రీ రిలీజ్ వసూళ్లు ఎలా ఉంటాయనేది చూడాలి.