IPL 2022: ఆక‌ట్టుకోని చెన్నై బ్యాటింగ్‌... గుజ‌రాత్ ల‌క్ష్యం 134 ప‌రుగులు

వ‌రుస ప‌రాజ‌యాల‌తో ఇప్ప‌టికే ఐపీఎల్ ప్లే ఆఫ్స్ నుంచి అవుట్ అయిన చెన్నై సూప‌ర్ కింగ్స్ ఆదివారం నాటి మ్యాచ్‌లో పెద్ద‌గా రాణించ‌లేదు. టాస్ గెలిచి బ్యాటింగ్ ఎంచుకున్న చెన్నై నిర్ణీత 20 ఓవ‌ర్ల‌లో 5 వికెట్ల‌ను కోల్పోయి కేవ‌లం 133 ప‌రుగులు మాత్ర‌మే చేయ‌గ‌లిగింది. చెన్నై ఓపెన‌ర్ రుతురాజ్ గైక్వాడ్(53) హాఫ్‌సెంచ‌రీతో మెరిసినా.. చెన్నై జ‌ట్టు గౌర‌వ‌ప్ర‌ద‌మైన స్కోరును చేయ‌డంలో విఫ‌ల‌మైంది. చెన్నై స్టార్ బ్యాట‌ర్ శివ‌మ్ దూబే ఈ మ్యాచ్‌లో డ‌కౌట్ అయ్యాడు. గైక్వాడ్‌కు తోడు నారాయ‌ణ్ జ‌గ‌దీశ‌న్ (39), మొయిన్ అలీ (21) ప‌రుగులు చేయ‌డంతో చెన్నై ఆ మాత్రం స్కోరు అయినా చేయ‌గ‌లిగింది.

ఇక గుజ‌రాత్ టైటాన్స్ బౌలింగ్ విష‌యానికి వ‌స్తే... కెప్టెన్ హార్దిక్ పాండ్యా స‌హా బౌల‌ర్లంతా పెద్ద‌గా వికెట్లు తీయ‌కున్నా... చెన్నై బ్యాట‌ర్ల‌ను ప‌రుగులు చేయ‌కుండా నిలువ‌రించ‌గ‌లిగారు. మొహ్మ‌ద్ ష‌మీకి 2 వికెట్లు ద‌క్క‌గా... ర‌షీద్ ఖాన్‌, జోసెఫ్‌, సాయి కిశోర్‌ల‌కు త‌లో వికెట్ ద‌క్కింది. మ‌రికాసేప‌ట్లో 134 ప‌రుగుల విజ‌య‌ల‌క్ష్యంతో గుజ‌రాత్ త‌న ఇన్నింగ్స్‌ను ప్రారంభించ‌నుంది.