Atulya Ravi: అఖిల్ 'ఏజెంట్'లో మరో అందాలభామ!

హీరోగా ఆరేళ్ల క్రితమే ఎంట్రీ ఇచ్చినా.. నాలుగు సినిమాలు చేసినా.. అఖిల్ అక్కినేనికి విజయం మాత్రం అంత త్వరగా రాలేదు. తాజాగా విడుదలైన 'మోస్ట్ ఎలిజిబుల్ బ్యాచ్ లర్' చిత్రం మాత్రం ఆ విజయాన్ని తెచ్చిపెట్టింది. బొమ్మరిల్లు భాస్కర్ దర్శకత్వంలో అఖిల్ నటించిన ఈ చిత్రం బాక్సాఫీసు వద్ద మంచి విజయాన్నే నమోదు చేసింది. ఆ ఉత్సాహంతో ఇప్పుడు తన తదుపరి చిత్రాన్ని అఖిల్ చేస్తున్నాడు.

ప్రముఖ దర్శకుడు సురేందర్ రెడ్డి దర్శకత్వం వహిస్తున్న ఈ చిత్రం పేరు 'ఏజెంట్'. స్పై థ్రిల్లర్ గా రూపొందుతున్న ఈ చిత్రంలో సాక్షి వైద్య కథానాయికగా నటిస్తోంది. కీలకమైన ఓ ప్రత్యేక పాత్రలో మలయాళ నటుడు మమ్ముట్టి నటిస్తున్నారు. ఈ చిత్రానికి సంబంధించిన తాజా షెడ్యూలు షూటింగ్ ఇటీవలే బుడాపెస్ట్ లో నిర్వహించారు. తదుపరి షెడ్యూలు షూటింగును త్వరలో హైదరాబాదులో ప్రారంభిస్తారు.
 
ఇదిలావుంచితే, ఈ చిత్రానికి సంబంధించిన అప్ డేట్ ఒకటి వచ్చింది. ఈ చిత్రానికి మరింత గ్లామర్ ను యాడ్ చేస్తూ, సెకండ్ హీరోయిన్ పాత్రకు తమిళ కథానాయిక అతుల్య రవిని తీసుకున్నట్టు తాజా సమాచారం. దీనికి సంబంధించిన అధికారిక ప్రకటన త్వరలో వస్తుంది. భారీ బడ్జెట్టుతో నిర్మిస్తున్న ఈ చిత్రంలో అఖిల్ సిక్స్ ప్యాక్ మేకోవర్ లో కనిపించనున్నాడు.