ఓల్డ్ మలక్‌పేట డివిజన్‌లో ప్రారంభమైన రీపోలింగ్

పార్టీ గుర్తు తారుమారు కావడంతో పోలింగ్ నిలిచిపోయిన ఓల్డ్ మలక్‌పేట డివిజన్‌లో నేడు రీపోలింగ్ జరుగుతోంది. ఇక్కడి డివిజన్ నంబరు 26లో సీపీఐ అభ్యర్థి ఎన్నికల గుర్తుకు బదులుగా సీపీఎం గుర్తును ముద్రించారు. పోలింగ్ ప్రారంభమయ్యాక దీనిని గుర్తించిన పార్టీ అభ్యర్థి విషయాన్ని ఎన్నికల అధికారుల దృష్టికి తీసుకెళ్లడంతో పోలింగ్ నిలిపివేశారు. దీంతో 3వ తేదీన రీపోలింగ్ నిర్వహించనున్నట్టు ఎన్నికల అధికారులు ప్రకటించారు.

రీపోలింగ్ కోసం అన్ని ఏర్పాట్లు చేసిన అధికారులు ఈసారి ఎటువంటి పొరపాట్లకు తావివ్వకుండా పక్కాగా జాగ్రత్తలు తీసుకున్నారు. ఏడు గంటలకు ప్రారంభమైన పోలింగ్ సాయంత్రం ఆరు గంటల వరకు కొనసాగనుంది. ఓల్డ్ మలక్‌పేటలోని 26వ డివిజన్‌లో మొత్తం ఏడుగురు అభ్యర్థులు బరిలో ఉన్నారు. అలాగే, మొత్తం 54,655 మంది ఓటర్లున్నారు. మొన్నటి పోలింగ్ సందర్భంగా ఓటు హక్కు వినియోగించుకున్న వారి ఎడమచేతి చూపుడువేలికి సిరా గుర్తు వేయడంతో నేడు మధ్య వేలికి వేయనున్నారు.