గతంలో తనకు వెంట్రుకలు పెరిగేందుకు మందిచ్చిన డాక్టర్ పై దాడులు చేయించిన డొనాల్డ్ ట్రంప్!

తల వెంట్రుకలు ఒత్తుగా పెరగడానికి మందిచ్చిన న్యూయార్క్ డాక్టర్ హెరాల్డ్ బోర్న్ స్టెయిన్ పై అమెరికా అధ్యక్షుడు డొనాల్డ్ ట్రంప్ దాడులు చేయించారట. ఈ విషయాన్ని సదరు డాక్టరే స్వయంగా వెల్లడించారు. గత సంవత్సరం ట్రంప్ బాడీగార్డులు తన పార్క్ అవెన్యూ ఆఫీసుపై దాడులు చేసి, ట్రంప్ మెడికల్ రికార్డులను స్వాధీనం చేసుకుని వెళ్లారని ఆరోపించారు. ట్రంప్ సంవత్సరాల తరబడి తానిచ్చిన ఔషధాన్ని వాడారని ఆయన తెలిపారు. తన ఆఫీసుకు వచ్చిన ట్రంప్ సిబ్బంది అరగంట పాటు నానా హంగామా చేశారని బోర్న్ స్టెయిన్ 'ఎన్బీసీ'కి వెల్లడించారు. వారి దాడితో తాను తీవ్రంగా భయపడ్డానని ఆయన అన్నారు.

ట్రంప్ దీర్ఘకాల బాడీగార్డ్ కీత్ స్కిల్లర్ తన వద్దకు వచ్చారని, ఆయనతో పాటు అప్పటి వైట్ హౌస్ కార్యకలాపాల నిర్వహణాధికారి అలెన్ గార్టెన్, ట్రంప్ ఆర్గనైజేషన్ నిర్వహిస్తున్న నిర్మాణ రంగ సంస్థకు చెందిన లాయర్ తన వద్దకు వచ్చారని ఆయన చెప్పారు. ట్రంప్ కు సంబంధించిన ల్యాబ్ రిపోర్టుల ఒరిజినల్ కాపీలు, పలు రకాల డాక్యుమెంట్లను వారు తీసుకుని వెళ్లారని తెలిపారు. కాగా, దాడి వార్తలు ఆరోపణలేనని, కల్పితాలని వైట్ హౌస్ స్పందించింది. అధ్యక్షుడి గత వైద్య పరీక్షలకు, వాటి ఫలితాలకు సంబంధించిన రికార్డులు సేకరించడం వైట్ హౌస్ హక్కని మెడికల్ ఆఫీసర్ తెలిపారు.