బౌలర్లకు తెలియకుండా బాల్ ట్యాంపరింగ్ ఎలా సాధ్యం?.. కమిన్స్ మాటలు నమ్మశక్యంగా లేవు: మురళీ కార్తీక్

ఆస్ట్రేలియా క్రికెట్‌లో 2018లో పెను ప్రకంపనలు సృష్టించిన 'శాండ్‌పేపర్' వివాదం మరోసారి భగ్గుమంది. ఈ వివాదంపై ఆస్ట్రేలియా బ్యాటర్ ఉస్మాన్ ఖవాజాకు భారత మాజీ స్పిన్నర్ మురళీ కార్తీక్ మద్దతుగా నిలవగా, ఆసీస్ టెస్టు కెప్టెన్ పాట్ కమిన్స్‌పై తీవ్ర స్థాయిలో విమర్శలు గుప్పించారు. బౌలర్లకు తెలియకుండా బాల్ ట్యాంపరింగ్ జరగడం అసాధ్యమని, కమిన్స్ మాటలు నమ్మశక్యంగా లేవని కార్తీక్ అన్నాడు.

2018లో దక్షిణాఫ్రికాతో కేప్‌టౌన్‌లో జరిగిన టెస్టు మ్యాచ్‌లో బంతిని శాండ్‌పేపర్‌తో ట్యాంపర్ చేసే ప్రణాళిక గురించి పాట్ కమిన్స్‌తో సహా జట్టులోని ఆటగాళ్లందరికీ ముందే తెలుసని ఉస్మాన్ ఖవాజా తన ఆత్మకథ 'సబ్ర'లో పేర్కొన్నాడు. ఈ వ్యాఖ్యలు ఆస్ట్రేలియా క్రికెట్‌లో దుమారం రేపాయి. అయితే, ఈ ఆరోపణలను పాట్ కమిన్స్, మిచెల్ స్టార్క్ తీవ్రంగా ఖండించారు. తన పుస్తకాన్ని అమ్ముకోవడానికే ఖవాజా ఇలాంటి వ్యాఖ్యలు చేస్తున్నాడని వారు ఆరోపించారు.

ఈ నేపథ్యంలో క్రిక్‌బజ్‌తో మాట్లాడుతూ మురళీ కార్తీక్ ఈ వివాదంపై స్పందించాడు. ఖవాజాకు మద్దతు పలుకుతూ కమిన్స్ వాదనను తోసిపుచ్చాడు. "బంతి స్వరూపాన్ని మార్చేది బౌలర్ల ప్రయోజనం కోసమే. అలాంటప్పుడు, నా కోసం ఇద్దరు ఫీల్డర్లు బంతిని పాడు చేస్తుంటే, ఆ విషయం నాకు తెలియదని ఎలా చెప్పగలను? ఈ మాటలను ఎవరైనా ఎలా నమ్మగలరు?" అని కార్తీక్ ప్రశ్నించాడు.

ఆ ఘటన జరిగినప్పుడు కేవలం ముగ్గురు ఆటగాళ్లపైనే వేటు వేయడం తనను ఆశ్చర్యపరిచిందని కార్తీక్ అన్నాడు. "మనం ఏమైనా కిండర్‌గార్టెన్‌లో ఉన్నామా? ఇలాంటివి నమ్మడానికి?" అని ఘాటుగా వ్యాఖ్యానించాడు. అసలు ఏం జరిగిందో డేవిడ్ వార్నర్ బయటపెడతాడని అందరూ ఎదురుచూశారని, కానీ ఖవాజా ఆ పనిచేశాడని కార్తీక్ గుర్తుచేశాడు. 

"జట్టులోని అందరికీ ఆ విషయం తెలుసని నేను కచ్చితంగా నమ్ముతున్నాను. వారంతా ఇప్పుడు ఒకే మాటపై నిలబడటానికి ప్రయత్నిస్తున్నారు" అని కార్తీక్ అభిప్రాయప‌డ్డాడు. మొత్తంమీద ఖవాజా పుస్తకంతో మళ్లీ వెలుగులోకి వచ్చిన ఈ వివాదం, మురళీ కార్తీక్ వ్యాఖ్యలతో మరింత వేడెక్కింది.