వాకింగ్ చేస్తూ కుప్పకూలిన మాజీ ఉపరాష్ట్రపతి జగదీప్ ధన్‌ఖడ్.. ఎయిమ్స్‌కు తరలింపు

భారత మాజీ ఉపరాష్ట్రపతి జగదీప్ ధన్‌ఖడ్ (75) తీవ్ర అస్వస్థతకు గురయ్యారు. ఉదయం వాకింగ్ చేస్తున్న సమయంలో ఆయన ఒక్కసారిగా కుప్పకూలి స్పృహ కోల్పోయారు. దీంతో అప్రమత్తమైన సిబ్బంది వెంటనే ఆయనను ఢిల్లీలోని ఎయిమ్స్ (AIIMS) కార్డియో-న్యూరో సెంటర్‌కు తరలించారు. ప్రస్తుతం ఆయన కార్డియాలజీ వైద్యుల పర్యవేక్షణలో చికిత్స పొందుతున్నారు.

ఈ ఉదయం రోజువారీ మార్నింగ్ వాక్ చేస్తున్న సమయంలో జగదీప్ ధన్‌ఖడ్ అకస్మాత్తుగా కిందపడిపోయారు. కొద్ది నిమిషాల పాటు ఆయన ఎటువంటి స్పందన లేకుండా అచేతనంగా ఉండిపోయారు. వెంటనే రంగంలోకి దిగిన భద్రతా సిబ్బంది, తొలుత ఆయనను పీసీఆర్ (PCR) వాహనంలో నివాసానికి చేర్చారు.

సమాచారం అందుకున్న వెంటనే ఐఎల్బీఎస్ (ILBS) వైద్య బృందంతో పాటు ఎయిమ్స్ ప్రముఖ కార్డియాలజిస్ట్ డాక్టర్ సందీప్ సేథ్.. ధన్‌ఖడ్ నివాసానికి చేరుకుని ప్రాథమిక వైద్య పరీక్షలు నిర్వహించారు. అయితే, ఆయన ఆరోగ్య పరిస్థితిలో కొన్ని ఆందోళనకరమైన లక్షణాలు కనిపించడంతో, మెరుగైన చికిత్స కోసం వెంటనే అంబులెన్స్‌లో ఎయిమ్స్‌లోని కార్డియో-న్యూరో సెంటర్‌కు తరలించారు.

ప్రస్తుతం ఎయిమ్స్ కార్డియాలజీ విభాగానికి చెందిన నిపుణుల బృందం ఆయనకు సమగ్ర వైద్య పరీక్షలు నిర్వహిస్తోంది. ఆయన ఆరోగ్య పరిస్థితిని నిరంతరం పర్యవేక్షిస్తున్నారు.