నవంబరు 12, 13వ తేదీల్లో విశాఖలో సీఐఐ సదస్సు.. హాజరుకానున్న అమిత్ షా, గోయల్, చంద్రబాబు

ఆంధ్రప్రదేశ్ పారిశ్రామిక ప్రగతిలో మరో కీలక ఘట్టానికి విశాఖపట్నం వేదిక కానుంది. నవంబర్ 12, 13 తేదీల్లో 31వ కాన్ఫెడరేషన్ ఆఫ్ ఇండియన్ ఇండస్ట్రీ (సీఐఐ) భాగస్వామ్య సదస్సు అట్టహాసంగా జరగనుంది. 'నేవిగేటింగ్ న్యూ వరల్డ్ ఆర్డర్' అనే థీమ్‌తో నిర్వహిస్తున్న ఈ సదస్సు, మారుతున్న ప్రపంచ ఆర్థిక వ్యవస్థలో ఆంధ్రప్రదేశ్‌ను కీలక కేంద్రంగా నిలపడమే లక్ష్యంగా సాగనుంది.

ఈ రెండు రోజుల సదస్సుకు ముఖ్యమంత్రి చంద్రబాబు, కేంద్ర హోం మంత్రి అమిత్ షా, కేంద్ర వాణిజ్య, పరిశ్రమల శాఖ మంత్రి పీయూష్ గోయల్ సహా పలువురు కేంద్ర మంత్రులు, పారిశ్రామిక దిగ్గజాలు హాజరుకానున్నారు. ప్రపంచ మార్కెట్లతో రాష్ట్ర పరిశ్రమలను అనుసంధానించడమే ధ్యేయంగా ఈ సదస్సును నిర్వహిస్తున్నట్లు ముఖ్యమంత్రి చంద్రబాబు తెలిపారు. ఈ సదస్సులో 58 దేశాలకు చెందిన ప్రభుత్వ, పారిశ్రామిక ప్రతినిధులు పాల్గొననుండటం దీని ప్రాధాన్యతను తెలియజేస్తోంది. సదస్సుకు కేంద్ర మంత్రి పీయూష్ గోయల్ అధ్యక్షత వహించనుండగా, సీఎం చంద్రబాబు సహాధ్యక్షుడిగా వ్యవహరించనున్నారు.

విశాఖలోని ఆంధ్రా విశ్వవిద్యాలయం ఇంజినీరింగ్ కాలేజీ గ్రౌండ్స్‌లో జరిగే ఈ సదస్సును నవంబర్ 12న కేంద్ర మంత్రులు అమిత్ షా, పీయూష్ గోయల్, సీఎం చంద్రబాబు లాంఛనంగా ప్రారంభిస్తారు. వాణిజ్యం, పెట్టుబడులు, క్వాంటం టెక్నాలజీ, సెమీ కండక్టర్లు, గ్రీన్ ఎనర్జీ, వ్యవసాయం వంటి ఆరు కీలక అంశాలపై ఈ సదస్సులో మేధోమథనం జరగనుంది. దీనికి సమాంతరంగా 'ఏపీ ఉమెన్ అండ్ గ్రోత్ సమ్మిట్ 2026' కూడా నిర్వహించనున్నారు. నవంబర్ 13న జరిగే ముగింపు కార్యక్రమానికి భారత ఉపరాష్ట్రపతి సి.పి. రాధాకృష్ణన్ ముఖ్య అతిథిగా హాజరవుతారు.

ఈ సదస్సు ద్వారా రాష్ట్రానికి భారీగా పెట్టుబడులను ఆకర్షించేందుకు ప్రభుత్వం విస్తృత ఏర్పాట్లు చేసింది. ఇప్పటికే సన్నాహకంగా నిర్వహించిన 6 ప్రాంతీయ సదస్సుల ద్వారా రూ.86,522 కోట్ల విలువైన 194 అవగాహన ఒప్పందాలు (ఎంఓయూ) కుదిరాయి. వీటి ద్వారా సుమారు 1.47 లక్షల మందికి ఉపాధి అవకాశాలు లభించనున్నాయి. ఈ సదస్సులో భాగంగా 400కు పైగా బిజినెస్ టు బిజినెస్ (B2B), బిజినెస్ టు గవర్నమెంట్ (B2G) సమావేశాలు జరగనున్నాయి. గత ఒప్పందాల అమలును పర్యవేక్షించేందుకు మంత్రి నారా లోకేశ్ నేతృత్వంలోని కమిటీ ఇప్పటికే చురుగ్గా పనిచేస్తోంది. ఈ సదస్సు రాష్ట్ర పారిశ్రామిక ముఖచిత్రాన్ని మార్చడంలో కీలక పాత్ర పోషిస్తుందని ప్రభుత్వం ధీమా వ్యక్తం చేస్తోంది.