నకిలీ ఐఫోన్లు అమ్ముతున్న వ్యక్తి అరెస్ట్

హైదరాబాద్‌లో అసలైన యాపిల్ ఉత్పత్తులంటూ నమ్మబలికి నకిలీ ఐఫోన్లు, స్మార్ట్‌వాచ్‌లను విక్రయిస్తూ వినియోగదారులను మోసం చేస్తున్న ఓ వ్యక్తిని పోలీసులు అరెస్ట్ చేశారు. నిందితుడిని ఉత్తరప్రదేశ్‌లోని ఘజియాబాద్‌కు చెందిన అల్తమాష్ (26)గా గుర్తించినట్లు రాయదుర్గం పోలీసులు శనివారం వెల్లడించారు. ప్రస్తుతం నిందితుడు మలక్‌పేటలోని సయీద్ నగర్‌లో నివాసం ఉంటున్నాడు.

పోలీసుల కథనం ప్రకారం.. అల్తమాష్ నకిలీ ఐఫోన్లు, యాపిల్ వాచ్‌లు, ఇయర్‌బడ్స్ వంటి ఎలక్ట్రానిక్ వస్తువులను అసలైనవిగా చూపిస్తూ అధిక ధరలకు విక్రయిస్తున్నాడు. విశ్వసనీయ సమాచారం అందుకున్న పోలీసులు దాడి చేసి నిందితుడిని అదుపులోకి తీసుకున్నారు. అతడి నుంచి ఒక నకిలీ ఐఫోన్‌ సహా రెండు మొబైల్ ఫోన్లు, నాలుగు నకిలీ స్మార్ట్‌వాచ్‌లు, ఏడు నకిలీ ఇయర్‌బడ్స్‌ను స్వాధీనం చేసుకున్నారు.

ఈ మోసపూరిత వ్యవహారంలో అల్తమాష్‌తో పాటు ఘజియాబాద్‌కే చెందిన అవాజ్ ఖాన్ అనే మరో వ్యక్తికి కూడా ప్రమేయం ఉన్నట్లు పోలీసులు గుర్తించారు. ప్రస్తుతం అవాజ్ ఖాన్ పరారీలో ఉన్నాడని, అతడి కోసం గాలిస్తున్నామని పోలీసులు వివరించారు. అరెస్ట్ చేసిన అల్తమాష్‌ను కోర్టులో హాజరుపరచగా, న్యాయస్థానం అతడికి జ్యుడీషియల్ రిమాండ్ విధించిందని తెలిపారు.