టెస్లా కీలక నిర్ణయం.. మూడేళ్లకే అంతమవుతున్న మస్క్‌ కల!

ప్రపంచవ్యాప్తంగా భారీ అంచనాలతో విడుదలైన టెస్లా సైబర్‌ట్రక్ ఉత్పత్తికి త్వరలో ముగింపు పలకనున్నారు. 2027 మధ్య నాటికి అమెరికాలోని టెక్సాస్ గిగాఫ్యాక్టరీలో ఈ వాహనాల తయారీని నిలిపివేయనున్నట్లు టెస్లా ప్రకటించింది. కంపెనీ సీఈవో ఎలాన్ మస్క్ ఈ విషయాన్ని సోషల్ మీడియా వేదిక ఎక్స్‌లో వెల్లడించారు. సైబర్‌ట్రక్ తయారీ నిలిపివేయడం ద్వారా ఆ ఉత్పత్తి సామర్థ్యాన్ని పూర్తిగా ఆటోమేటిక్ ట్యాక్సీ అయిన సైబర్‌క్యాబ్ తయారీకి మళ్లించనున్నట్లు తెలిపారు.

టెస్లా 2019లో సైబర్‌ట్రక్‌ను కాన్సెప్ట్ వాహనంగా పరిచయం చేసింది. తొలుత 2021లోనే మార్కెట్లోకి తీసుకురావాలని భావించినా ఆలస్యమైంది. చివరకు 2023లో ఉత్పత్తి ప్రారంభించి విక్రయాలు చేపట్టింది. స్టెయిన్‌లెస్ స్టీల్‌తో రూపొందించిన విలక్షణమైన ఆకృతి ఈ వాహనానికి ప్రత్యేక గుర్తింపు తెచ్చింది. అయితే దీని డిజైన్‌పై భిన్నాభిప్రాయాలు వ్యక్తమయ్యాయి. యూరప్ భద్రతా నిబంధనలకు అనుగుణంగా లేకపోవడంతో అక్కడ విక్రయాలకు అవకాశం లేకుండా పోయింది.

ప్రారంభంలో భారీ ఆసక్తి కనిపించినా తర్వాత అమ్మకాలు తగ్గుముఖం పట్టాయి. ఇప్పటివరకు ప్రపంచవ్యాప్తంగా 63 వేలకుపైగా సైబర్‌ట్రక్‌లు అమ్ముడైనట్లు అంచనా. అయితే ఏడాదికి 2.5 లక్షల వాహనాలు విక్రయించాలన్న మస్క్ గత అంచనాను ఈ సంఖ్య అందుకోలేకపోయింది. ప్రారంభంలో ప్రకటించిన ధర కంటే మార్కెట్లోకి వచ్చినప్పుడు ధర ఎక్కువగా ఉండటం, మస్క్ చుట్టూ నెలకొన్న వివాదాలు కూడా ఆదరణ తగ్గడానికి కారణాలుగా నిలిచాయి.

సైబర్‌ట్రక్ తర్వాత టెస్లా దృష్టి సైబర్‌క్యాబ్‌పై ఉండనుంది. స్టీరింగ్ వీల్, పెడల్స్, వెనుక అద్దాలు, వెనుక గాజు లేకుండా రూపొందిస్తున్న ఈ వాహనం పూర్తిగా స్వయంచాలకంగా నడిచే ఎలక్ట్రిక్ ట్యాక్సీ. సైబర్‌ట్రక్ ఉత్పత్తి ఆగిన తర్వాత టెస్లా ప్రయాణికుల వాహనాల విభాగంలో మోడల్ 3, మోడల్ వై మాత్రమే ప్రధానంగా మిగలనున్నాయి. 2028లో కొత్త తరం రోడ్‌స్టర్ డెలివరీలు ప్రారంభమవుతాయని కంపెనీ హామీ ఇచ్చింది.