ఓటేసిన పరిటాల కుటుంబం.. వైసీపీపై సునీత విమర్శలు

రాష్ట్రవ్యాప్తంగా జరుగుతున్న ఎంపీటీసీ, జడ్పీటీసీ ఎన్నికల పోలింగ్‌లో భాగంగా రాప్తాడు ఎమ్మెల్యే పరిటాల సునీత తన ఓటు హక్కును వినియోగించుకున్నారు. నసనకోటలోని ప్రభుత్వ పాఠశాలలో ఏర్పాటు చేసిన పోలింగ్ కేంద్రంలో ఆమె తన కుమారులు పరిటాల శ్రీరామ్, పరిటాల సిద్ధార్థతో కలిసి ఓటేశారు.

ఈ సందర్భంగా పరిటాల సునీత మాట్లాడుతూ... రాప్తాడు నియోజకవర్గంలో ఎన్నికలు ప్రశాంత వాతావరణంలో జరుగుతున్నాయని తెలిపారు. వైసీపీ నేతలపై ఆమె విమర్శలు గుప్పించారు. "గొడ్డలి పార్టీ వారు అనవసరంగా మాట్లాడుతున్నారు. రాప్తాడులో రిగ్గింగ్ చేస్తున్నారని వారు ఆరోపించడం సబబు కాదు" అని ఆమె వ్యాఖ్యానించారు. ప్రతి ఒక్కరూ తమ ఓటు హక్కును తప్పనిసరిగా వినియోగించుకోవాలని పిలుపునిచ్చారు. ఈ ఎన్నికలలో కూటమి క్లీన్ స్వీప్ చేయబోతోందని పరిటాల శ్రీరామ్ ధీమా వ్యక్తం చేశారు.

మరోవైపు, జిల్లా వ్యాప్తంగా ఎంపీటీసీ, జడ్పీటీసీ ఎన్నికల పోలింగ్ ప్రశాంతంగా కొనసాగుతోంది. ఉదయం నుంచే ఓటర్లు పోలింగ్ కేంద్రాలకు తరలివచ్చి తమ ఓటు హక్కును వినియోగించుకుంటున్నారు. జిల్లాలో ఉదయం 9 గంటల సమయానికి 12.66 శాతం పోలింగ్ నమోదైనట్లు అధికారులు తెలిపారు. ఎలాంటి అవాంఛనీయ ఘటనలు జరగకుండా ఎన్నికల సిబ్బంది పటిష్టమైన ఏర్పాట్లు చేశారు.