ఇరాన్‌తో యుద్ధం చేద్దామా? వద్దా?.. డైలమాలో ట్రంప్

అమెరికా మధ్యంతర ఎన్నికల ఫలితాలు అధ్యక్షుడు డొనాల్డ్ ట్రంప్‌కు ఇరాన్‌తో కొనసాగుతున్న వివాదం విషయంలో కొత్త సవాళ్లను విసురుతున్నాయి. ఈ ఎన్నికల్లో రిపబ్లికన్ పార్టీ పరాజయం పాలవడం, కాంగ్రెస్‌పై డెమొక్రాట్లు పట్టు సాధించడంతో ఇరాన్‌పై సైనిక చర్యలు చేపట్టే విషయంలో ట్రంప్‌కు ఉన్న స్వేచ్ఛకు కళ్లెం పడినట్లయింది. యుద్ధం కారణంగా జీవన వ్యయం పెరిగిందన్న అమెరికన్ ఓటర్ల అభిప్రాయం కూడా ఈ ఒత్తిడిని మరింత పెంచుతోంది.

ఈ ఏడాది మొదట్లో అమెరికా-ఇజ్రాయెల్ సంయుక్తంగా దాడులు ప్రారంభించడంతో ఇరాన్‌తో వివాదం మొదలైంది. ఈ దాడులతో ఇరాన్ సైనిక సామర్థ్యానికి కొంత నష్టం వాటిల్లినా, దాని అణు కార్యక్రమం, హర్మూజ్ జలసంధిలో నౌకాయాన భద్రత వంటి కీలక అంశాలు మాత్రం పరిష్కారం కాలేదు. ప్రస్తుత పరిస్థితుల్లో అమెరికా యుద్ధాన్ని మరింత విస్తృతం చేయడం కంటే చర్చల ద్వారా ఒక ముగింపునకు రావాలని ప్రయత్నిస్తుందని గల్ఫ్ దేశాల అధికారులు, విశ్లేషకులు భావిస్తున్నారు.

గల్ఫ్ ప్రభుత్వ వర్గాల సమాచారం ప్రకారం, ఇరాన్‌పై పూర్తిస్థాయి దాడి జరిగే అవకాశాలు తక్కువ. అణు కేంద్రాలపై పరిమిత దాడులు చేసి, నిర్దేశిత లక్ష్యాలను చేరుకున్నామని ప్రకటించి, యుద్ధాన్ని ముగించడం ఒక మార్గంగా కనిపిస్తోంది. చైనా మధ్యవర్తిత్వ ప్రయత్నాలు కూడా ఈ దిశగానే సాగుతున్నాయి. మరోవైపు, ప్రస్తుత నౌకా దిగ్బంధనం, ఆర్థిక ఆంక్షలను కొనసాగిస్తూనే చర్చలకు ఇరాన్ సుముఖతను పరీక్షించడం మరో వ్యూహం.

అయితే, ఇరుపక్షాలు పరిస్థితిని తప్పుగా అంచనా వేసే ప్రమాదం ఉందని విశ్లేషకులు హెచ్చరిస్తున్నారు. ఎన్నికల ఒత్తిళ్లు లేకపోవడంతో, ఇరాన్ విజయం సాధించిందన్న భావనను నివారించేందుకు ట్రంప్ మళ్లీ దూకుడుగా వ్యవహరించే అవకాశం లేకపోలేదని కొందరు వాదిస్తున్నారు. మరోవైపు, అమెరికాకు లొంగిపోయే ప్రసక్తే లేదని ఇరాన్ స్పష్టం చేస్తోంది. అమెరికా ఎన్నికల ఫలితాలను తమ దేశ ప్రజలు యుద్ధాన్ని తిరస్కరించడంగా టెహ్రాన్ అభివర్ణిస్తోంది. ఇదే సమయంలో ఇజ్రాయెల్‌లో ప్రధాని బెంజమిన్ నెతన్యాహు సంకీర్ణ ప్రభుత్వం కూడా రాజకీయంగా బలహీనపడటం ఈ సమీకరణాలను మరింత సంక్లిష్టం చేస్తోంది. వాషింగ్టన్ వైఖరిని టెహ్రాన్ ఎలా అర్థం చేసుకుంటుందన్న దానిపైనే దౌత్యమార్గం ముందుకు వెళ్తుందా? లేక ఉద్రిక్తతలు పెరుగుతాయా? అనేది ఆధారపడి ఉంది.