చెక్కుపై డబ్బు రాసిన తర్వాత చివర్లో ‘ONLY’ అని ఎందుకు రాస్తారు? దీని వెనుక అసలు కారణం ఇదే!

బ్యాంకు చెక్కులు రాసేటప్పుడు అంకెల్లో మొత్తాన్ని నమోదు చేయడంతో పాటు, అక్షరాల్లోనూ రాస్తుంటాం. అయితే అక్షరాల్లో మొత్తం రాసిన తర్వాత చివర్లో ‘ఓన్లీ’ (ONLY) అనే పదాన్ని చేర్చడం గమనించే ఉంటారు. ఉదాహరణకు రూ.10 వేల చెక్కు ఇస్తే ‘టెన్‌ థౌజండ్‌ రూపీస్‌ ఓన్లీ’ అని రాస్తారు. దశాబ్దాలుగా కొనసాగుతున్న ఈ అలవాటు వెనుక ఓ ముఖ్యమైన భద్రతా కారణం ఉంది. 

చెక్కుపై అక్షరాల్లో మొత్తం రాసిన తర్వాత ఖాళీ స్థలం మిగిలితే దాన్ని ఇతరులు దుర్వినియోగం చేసే అవకాశం ఉంటుంది. ఆ ఖాళీలో అదనపు పదాలు చేర్చి చెల్లించాల్సిన మొత్తాన్ని పెంచేందుకు ప్రయత్నించవచ్చు. ఉదాహరణకు ‘టెన్‌ థౌజండ్‌’ అని మాత్రమే రాసి వదిలేస్తే.. దాని తర్వాత ‘నైన్‌ హండ్రెడ్‌’ అని చేర్చి రూ.10,900గా మార్చే ప్రమాదం ఉంటుంది. అదే ‘టెన్‌ థౌజండ్‌ ఓన్లీ’ అని రాస్తే, ఆ మొత్తమే అంతిమమని స్పష్టమవుతుంది. దీంతో చెక్కుపై అక్రమ మార్పులకు అవకాశం తగ్గుతుంది.

అయితే చెక్కుపై ‘ఓన్లీ’ అని రాయడం తప్పనిసరి నిబంధన కాదు. భారతీయ రిజర్వ్‌ బ్యాంకు (ఆర్‌బీఐ) ప్రతి చెక్కుపైనా ఈ పదం తప్పనిసరిగా ఉండాలని ప్రత్యేకంగా ఆదేశించలేదు. అయినప్పటికీ, భద్రతా చర్యగా బ్యాంకులు ఈ పద్ధతిని పాటించాలని సూచిస్తున్నాయి. 

చెక్కు రాసేటప్పుడు మరికొన్ని జాగ్రత్తలు కూడా తీసుకోవాలి. అంకెల్లో, అక్షరాల్లో రాసిన మొత్తాలు ఒకేలా ఉన్నాయో లేదో సరిచూసుకోవాలి. మొత్తం రాసిన తర్వాత మిగిలిన ఖాళీని గీతతో కొట్టివేయాలి. చెల్లింపు పొందే వ్యక్తి పేరు, తేదీ సరిగ్గా నమోదు చేయాలి. చెక్కుపై దిద్దుబాట్లు, ఓవర్‌రైటింగ్‌ చేయకూడదు. ఏదైనా పొరపాటు జరిగితే కొత్త చెక్కు రాయడం మంచిది. 

చెక్కు ఎగువ ఎడమవైపు రెండు సమాంతర గీతలు గీసి ‘A/C Payee’ అని రాస్తే, ఆ చెక్కు ద్వారా చెల్లించే మొత్తం సంబంధిత వ్యక్తి బ్యాంకు ఖాతాలోనే జమ అవుతుంది. ఈ విధానం కూడా చెల్లింపులను మరింత సురక్షితంగా ఉంచుతుంది.