ప్రజల కడుపు మాడుతున్నా.. సైనిక ఖర్చులకే పాకిస్థాన్ పెద్దపీట!

పాకిస్థాన్‌లో ప్రజలు తీవ్రమైన ఆకలి, పోషకాహార లోపంతో బాధపడుతుంటే.. అక్కడి ప్రభుత్వం మాత్రం ప్రజారోగ్యం, ఆహార భద్రత వంటి కీలక రంగాలను విస్మరించి సైనిక సామగ్రి కొనుగోలుకు అధిక ప్రాధాన్యత ఇస్తోంది. ఇటీవల విడుదలైన ఒక నివేదిక ప్రకారం పాక్ ప్రభుత్వం తన బడ్జెట్‌లో రక్షణ రంగానికి భారీగా నిధులు కేటాయించి, ప్రజల అవసరాలను గాలికొదిలేసింది. ఈ వివరాలను 'యూరోపియన్ టైమ్స్ న్యూస్' పోర్టల్ తన కథనంలో వెల్లడించింది.

2026-27 ఆర్థిక సంవత్సరానికి గానూ పాకిస్థాన్ ప్రభుత్వం రక్షణ శాఖకు ఏకంగా 3 ట్రిలియన్ల పాకిస్థానీ రూపాయలను కేటాయించింది. ఇది గత ఏడాదితో పోలిస్తే 17.6 శాతం ఎక్కువ. ముఖ్యంగా ఆయుధాలు, ఇతర సైనిక సామగ్రి కొనుగోలుకు కేటాయించే నిధిని 39.6 శాతం పెంచి 925.8 బిలియన్ రూపాయలకు చేర్చింది. 

మరోవైపు దేశ ప్రజలందరి ఆరోగ్యానికి కేటాయించింది కేవలం 53.3 బిలియన్ రూపాయలు మాత్రమే. ఇందులో ఆరోగ్యం, పోషకాహారం అభివృద్ధికి కేటాయించింది కేవలం 24.3 బిలియన్లు. విచిత్రం ఏంటంటే, సైనిక సిబ్బంది పెన్షన్ల కోసం బడ్జెట్‌లో ప్రత్యేకంగా 822 బిలియన్ రూపాయలు కేటాయించారు. 

ఇది మొత్తం ఆరోగ్య బడ్జెట్ కంటే 15 రెట్లు అధికం. "ప్రజల ఆరోగ్యంపై ఒక రూపాయి ఖర్చు చేస్తే, సైన్యంపై 56 రూపాయలు ఖర్చుచేస్తూ పాక్ ప్రభుత్వం దేనికి విలువిస్తుందో స్పష్టం చేసింది" అని ఆ కథనం పేర్కొంది.

ప్రభుత్వ ప్రాధాన్యతల ఫలితంగా పాకిస్థాన్‌లో ఆకలి స్థాయులు తీవ్రంగా పెరిగాయి. 2026 ప్రపంచ ఆకలి సూచీలో 122 దేశాల్లో పాకిస్థాన్ 106వ స్థానంలో నిలిచింది. దాని స్కోరు 25.5గా నమోదైంది. పొరుగున ఉన్న బంగ్లాదేశ్ (19.2), నేపాల్ (14.5), భారత్ (24.1) కంటే కూడా పాక్ పరిస్థితి దారుణంగా ఉంది. ఆర్థిక సంక్షోభంలో కూరుకుపోయిన శ్రీలంక కూడా పుంజుకుని 10.2 స్కోరుతో దక్షిణాసియాలోనే అత్యుత్తమ ప్రదర్శన కనబరిచింది.

దేశంలో పోషకాహార లోపం 16.1 శాతానికి, ఐదేళ్లలోపు పిల్లల్లో ఎదుగుదల లోపం 33.6 శాతానికి, బరువు తక్కువగా ఉండటం (చైల్డ్ వేస్టింగ్) 9.8 శాతానికి చేరింది. ఐదేళ్లలోపు పిల్లల మరణాల రేటు 5.6 శాతంగా ఉంది. ఇది ప్రజారోగ్య అత్యవసర పరిస్థితిని సూచిస్తున్నా, ప్రభుత్వం పట్టించుకోవడం లేదు. 

దీనికి తోడు గోధుమ మద్దతు ధర విధానాన్ని రద్దు చేయడంతో సేకరణ దారుణంగా పడిపోయింది. దీంతో 1 బిలియన్ డాలర్లకు పైగా ఖర్చు చేసి సుమారు 3.5 మిలియన్ టన్నుల గోధుమలను దిగుమతి చేసుకోవాల్సిన పరిస్థితి ఏర్పడింది. ప్రస్తుతం కూడా అదే స్థాయిలో ఆహార కొరత ఉండటంతో, రాబోయే రోజుల్లో పిండి ధర సామాన్యులకు అందనంతగా పెరిగిపోతుందని నిపుణులు హెచ్చరిస్తున్నారు.