‘‘నేను నేరుగా బరిలో ఉంటేనా’’.. మధ్యంతర ఎన్నికల ఫలితాలపై ట్రంప్‌ తొలి స్పందన!

అమెరికా మధ్యంతర ఎన్నికల్లో రిపబ్లికన్‌ పార్టీకి ఎదురుదెబ్బలు తగిలాయి. కీలక స్థానాల్లో డెమోక్రాట్లు విజయాలు సాధిస్తుండటంతో అధ్యక్షుడు డొనాల్డ్‌ ట్రంప్‌ స్పందించారు. తాను నేరుగా ఎన్నికల బరిలో ఉండి ఉంటే రిపబ్లికన్లు భారీ మెజారిటీతో గెలిచేవారని వ్యాఖ్యానించారు. తన సోషల్‌ మీడియా వేదిక ట్రూత్‌ సోషల్‌లో ఈ మేరకు పోస్టు చేశారు. మరోవైపు, ఎన్నికల ఫలితాలు ట్రంప్‌ నాయకత్వానికి ప్రజల నుంచి వచ్చిన తీర్పుగా రాజకీయ వర్గాలు విశ్లేషిస్తున్నాయి.

కీలక స్థానాల్లో డెమోక్రాట్ల జోరు
సెనేట్‌ ఎన్నికల్లో నార్త్‌ కరోలినా, సౌత్‌ కరోలినా, టెక్సాస్‌, ఒహాయోలో డెమోక్రాట్లు విజయాలు సాధించారు. జార్జియా, న్యూ హాంప్‌షైర్‌లలో తమ స్థానాలను నిలబెట్టుకున్నారు. టెక్సాస్‌లో జేమ్స్‌ తలారికో విజయం సాధించగా, ఒహాయోలో షెర్రాడ్‌ బ్రౌన్‌ గెలిచారు. దీంతో టెక్సాస్‌లో మూడు దశాబ్దాల తర్వాత డెమోక్రాట్లకు రాష్ట్రవ్యాప్త విజయం దక్కింది. 

ట్రంప్‌ మద్దతున్న అభ్యర్థులకూ ఓటమి
ట్రంప్‌ ప్రచారం చేసిన పలువురు రిపబ్లికన్‌ అభ్యర్థులు పరాజయం పాలయ్యారు. నార్త్‌ కరోలినాలో మైఖేల్‌ వాట్లీపై రాయ్‌ కూపర్‌ గెలిచారు. టెక్సాస్‌లో కెన్‌ పాక్స్‌టన్‌పై జేమ్స్‌ తలారికో విజయం సాధించారు. ఒహాయో గవర్నర్‌ ఎన్నికల్లో వివేక్‌ రామస్వామిని డెమోక్రాట్‌ అమీ ఆక్టన్‌ ఓడించారు. జార్జియాలో కీషా లాన్స్‌ బాటమ్స్‌ విజయం సాధించి రాష్ట్రానికి తొలి నల్లజాతి మహిళా గవర్నర్‌గా నిలిచారు. 

ధరల పెరుగుదలే ప్రధాన ప్రభావం
అమెరికాలో జీవన వ్యయం, ద్రవ్యోల్బణం ఓటర్ల నిర్ణయంపై ప్రభావం చూపినట్లు సర్వేలు వెల్లడించాయి. దాదాపు 75 శాతం మంది దేశ ఆర్థిక పరిస్థితి బాగోలేదని అభిప్రాయపడ్డారు. సుమారు 80 శాతం మంది ద్రవ్యోల్బణం తమ కుటుంబాలపై ఆర్థిక భారం మోపిందని తెలిపారు. ఈ ఫలితాలు ట్రంప్‌ రెండో పదవీకాలంలో మిగిలిన రెండేళ్ల రాజకీయ పరిస్థితులను ప్రభావితం చేయనున్నాయి. ప్రతినిధుల సభపై డెమోక్రాట్లు పట్టు సాధిస్తే ప్రభుత్వంపై విచారణలు, పర్యవేక్షణకు వారికి మరిన్ని అవకాశాలు లభిస్తాయి.