భారత్‌లో యాపిల్‌ రికార్డుల మోత.. ఐఫోన్‌ అమ్మకాల్లో కొత్త చరిత్ర!

భారత్‌లో యాపిల్‌ ఉత్పత్తులకు ఆదరణ పెరుగుతోంది. ఐఫోన్ల నుంచి మ్యాక్‌బుక్‌లు, డిజిటల్‌ సేవల వరకు కంపెనీ వ్యాపారం కొత్త గరిష్ఠాలను అందుకుంది. 2026 సెప్టెంబరుతో ముగిసిన త్రైమాసికంలో భారత్‌లో ఎన్నడూ లేనంత ఆదాయాన్ని నమోదు చేసినట్లు యాపిల్‌ సీఈఓ జాన్‌ టెర్నస్‌ వెల్లడించారు. కొత్త ఐఫోన్లకు మారుతున్న వినియోగదారుల సంఖ్య కూడా రికార్డు స్థాయికి చేరిందని తెలిపారు.

సెప్టెంబరుతో ముగిసిన త్రైమాసిక ఫలితాల వెల్లడిలో టెర్నస్‌ ఈ వివరాలు తెలిపారు. అమెరికా, ఐరోపా, గ్రేటర్‌ చైనా, ఆసియా పసిఫిక్‌ ప్రాంతాల్లోనూ ఆదాయంలో రికార్డులు నమోదయ్యాయని చెప్పారు. అభివృద్ధి చెందిన దేశాలతో పాటు వర్ధమాన మార్కెట్లలోనూ కంపెనీ వృద్ధి సాధించిందని పేర్కొన్నారు.

ఐఫోన్లకు పెరుగుతున్న డిమాండ్‌
ప్రపంచవ్యాప్తంగా సెప్టెంబరు త్రైమాసికంలో ఐఫోన్‌ ద్వారా 57.6 బిలియన్‌ డాలర్ల ఆదాయం వచ్చింది. గతేడాది ఇదే కాలంతో పోలిస్తే ఇది 17 శాతం ఎక్కువ. సరఫరా పరిమితులు, విదేశీ మారకపు విలువల్లో మార్పులు ఉన్నప్పటికీ ఈ వృద్ధి నమోదైంది. భారత్‌లో ఐఫోన్‌ 17 మోడల్‌ మూడో త్రైమాసికంలో అత్యధికంగా రవాణా చేసిన మోడల్‌గా నిలిచినట్లు కౌంటర్‌పాయింట్‌ రీసెర్చ్‌ వెల్లడించింది.

మ్యాక్‌బుక్‌, సేవల్లోనూ రికార్డులు
మ్యాక్‌ విభాగం ప్రపంచ ఆదాయం 10.8 బిలియన్‌ డాలర్లకు చేరింది. గత ఏడాదితో పోలిస్తే 24 శాతం వృద్ధి నమోదైంది. మ్యాక్‌బుక్‌ నియో, మ్యాక్‌బుక్‌ ప్రో విక్రయాలు ఇందుకు దోహదపడ్డాయి. భారత్‌లో మ్యాక్‌ విభాగం కూడా రికార్డు స్థాయి పనితీరు కనబరిచింది. యాపిల్‌ సేవల ఆదాయం ప్రపంచవ్యాప్తంగా 31.6 బిలియన్‌ డాలర్లకు చేరింది. వార్షిక ప్రాతిపదికన ఇది 10 శాతం పెరిగింది. భారత్‌లోనూ సేవల విభాగం అత్యధిక ఆదాయాన్ని నమోదు చేసింది.

వెయ్యి డాలర్లు దాటిన సగటు ధర
కౌంటర్‌పాయింట్‌ రీసెర్చ్‌ డైరెక్టర్‌ తరుణ్‌ పాఠక్‌ ప్రకారం.. భారత్‌లో ఐఫోన్‌ సరఫరాలు గత ఏడాదితో పోలిస్తే తగ్గినప్పటికీ, ఒక్కో ఐఫోన్‌ సగటు విక్రయ ధర వెయ్యి డాలర్లను దాటింది. సులభ వాయిదా చెల్లింపులు, పాత ఫోన్ల మార్పిడి సదుపాయాలు, విక్రయ కేంద్రాల విస్తరణ, స్థానిక తయారీ యాపిల్‌ వృద్ధికి తోడ్పడుతున్నాయని ఆయన వివరించారు. భారత్‌లో యాపిల్‌ ఉత్పత్తులపై ఆసక్తి మరింత పెరిగే అవకాశం ఉందని అభిప్రాయపడ్డారు.