హెచ్‌పీసీఎల్‌లో భారీ అగ్నిప్రమాదం.. ఉలిక్కిపడిన విశాఖ నగరం

విశాఖపట్నంలోని హిందుస్థాన్ పెట్రోలియం కార్పొరేషన్ లిమిటెడ్ (హెచ్‌పీసీఎల్) రిఫైనరీలో సోమవారం సాయంత్రం భారీ అగ్నిప్రమాదం సంభవించింది. రిఫైనరీ ప్రాంగణం నుండి ఒక్కసారిగా మంటలు ఎగసిపడటంతో ఆ ప్రాంతమంతా దట్టమైన నల్లటి పొగ అలుముకుంది. ఈ ఘటనతో నగరంలో ఒక్కసారిగా కలకలం రేగింది.

ఎగసిపడుతున్న అగ్నికీలలను, దట్టమైన పొగను చూసి సమీప ప్రాంతాల ప్రజలు తీవ్ర భయాందోళనలకు గురయ్యారు. ప్రాణభయంతో ఇళ్ల నుండి బయటకు వచ్చి సురక్షిత ప్రాంతాలకు పరుగులు తీశారు. సమాచారం అందిన వెంటనే హెచ్‌పీసీఎల్ అంతర్గత భద్రతా విభాగం (సేఫ్టీ వింగ్) సిబ్బంది యుద్ధప్రాతిపదికన ఘటనా స్థలానికి చేరుకుని, మంటలను అదుపులోకి తెచ్చే చర్యలు చేపట్టారు.

రిఫైనరీలో ఏదైనా పేలుడు సంభవించిన కారణంగానే మంటలు చెలరేగి ఉండవచ్చని అధికారులు ప్రాథమికంగా భావిస్తున్నారు. అయితే, ప్రమాదానికి గల కచ్చితమైన కారణాలు, జరిగిన ఆస్తి నష్టంపై స్పష్టత రావాల్సి ఉంది. ఈ ఘటనలో ప్రాణనష్టం జరిగినట్లు ఇప్పటివరకు ఎలాంటి సమాచారం అందలేదు. అధికారులు ఈ ప్రమాదంపై పూర్తిస్థాయి దర్యాప్తు ప్రారంభించారు.