శీతాకాలంలో ఆకలి ఎందుకు పెరుగుతుంది?.. దీని వెనుక సైన్స్ ఇదే!

చలికాలం రాగానే చాలామందికి ఆకలి పెరగడం, వేడివేడిగా ఏదైనా తినాలనిపించడం సాధారణం. వేడి పరాఠాలు, వేయించిన స్నాక్స్, తీపి పదార్థాల కోసం మనసు లాగుతుంటుంది. అయితే ఇది కేవలం చల్లని వాతావరణం వల్ల మాత్రమే కాదని, దీని వెనుక అనేక జీవ, హార్మోనల్, జీవనశైలికి సంబంధించిన శాస్త్రీయ కారణాలున్నాయని ఆరోగ్య నిపుణులు వివరిస్తున్నారు. ఈ మార్పుల గురించి తెలుసుకోవడం మన ఆహారపు అలవాట్లను నియంత్రించుకోవడానికి సహాయపడుతుంది.

వాతావరణం చల్లగా ఉన్నప్పుడు శరీరం తన అంతర్గత ఉష్ణోగ్రతను నిలకడగా ఉంచుకోవడానికి ఎక్కువ శక్తిని ఖర్చు చేస్తుంది. ఈ ప్రక్రియలో కొంతమేర అదనపు కేలరీలు అవసరమవుతాయి. అయితే, ఆధునిక జీవనశైలిలో ఎక్కువ సమయం ఇళ్లలోనే వెచ్చగా గడపడం వల్ల ఈ ప్రభావం చాలా తక్కువగా ఉంటుందని నిపుణులు అంటున్నారు. కాబట్టి, కేవలం చలిని కారణంగా చూపి అతిగా తినడాన్ని సమర్థించుకోలేమని స్పష్టం చేస్తున్నారు.

శీతాకాలంలో ఆకలి పెరగడానికి ప్రధాన కారణం హార్మోన్లలో వచ్చే మార్పులే. ఈ కాలంలో పగటి సమయం తక్కువగా ఉండటంతో సూర్యరశ్మి తక్కువగా మన శరీరంపై పడుతుంది. ఇది 'సెరొటోనిన్' అనే హార్మోన్ ఉత్పత్తిని తగ్గిస్తుంది. సెరొటోనిన్ మన మానసిక స్థితిని నియంత్రిస్తుంది. దీని స్థాయులు తగ్గితే ఒత్తిడి పెరిగి, భావోద్వేగపరంగా తినే అలవాటు (ఎమోషనల్ ఈటింగ్) మొదలవుతుంది. 

ముఖ్యంగా చక్కెర, పిండి పదార్థాలు ఎక్కువగా ఉన్న ఆహారంపై కోరికలు పెరుగుతాయి. అలాగే, సూర్యరశ్మి తగ్గడం, నిద్ర సరిగా లేకపోవడం వంటివి 'ఘ్రెలిన్' (ఆకలిని ప్రేరేపించే హార్మోన్), 'లెప్టిన్' (ఆకలిని తగ్గించే హార్మోన్)ల సమతుల్యతను దెబ్బతీస్తాయి. దీంతో తరచుగా ఆకలి వేస్తున్నట్లు అనిపిస్తుంది.

వీటికి తోడు జీవనశైలిలో మార్పులు కూడా ఈ సమస్యను మరింత పెంచుతాయి. చలికాలంలో బయటకు వెళ్లి వ్యాయామం చేయడం తగ్గుతుంది. ఎక్కువ సమయం ఇంట్లోనే ఉండటంతో చేతికి అందిన స్నాక్స్ తింటూ ఉంటాం. రాత్రిపూట ఎక్కువ సేపు స్క్రీన్ చూడటం వల్ల కూడా హార్మోన్ల అసమతుల్యత పెరిగి, ఆకలి నియంత్రణ తప్పుతుంది.

ఈ సమస్యను అధిగమించడానికి నిపుణులు కొన్ని సూచనలు ఇస్తున్నారు. పప్పులు, గుడ్లు, పెరుగు, నట్స్, సీజనల్ పండ్లు, సూప్‌లు, ఖిచ్డీ వంటి సమతుల్య ఆహారం తీసుకోవాలి. ఇవి ఎక్కువసేపు కడుపు నిండుగా ఉన్న అనుభూతిని కలిగిస్తాయి. అయితే, అసాధారణమైన ఆకలితో పాటు అధిక దాహం, తీవ్రమైన అలసట వంటి లక్షణాలు కనిపిస్తే మాత్రం వెంటనే వైద్యుడిని సంప్రదించడం మంచిది.