శశికళకు భారీ షాక్.. తాను స్థాపించిన పార్టీ నుంచే తొలగింపు!

తమిళనాడు దివంగత ముఖ్యమంత్రి జయలలిత నెచ్చెలి వీకే శశికళకు తన సొంత పార్టీలోనే ఊహించని పరిణామం ఎదురైంది. ఈ ఏడాది ఆమె స్థాపించిన ఆల్ ఇండియా పురట్చి తలైవర్ మక్కల్ మున్నేట్ర కజగం (ఏఐపీటీఎంఎంకే) పార్టీ ప్రధాన కార్యదర్శి పదవి నుంచి ఆమెను తొలగిస్తున్నట్లు పార్టీ వ్యవస్థాపక అధ్యక్షుడు చక్రవర్తి సంచలన ప్రకటన చేశారు.

చెన్నైలోని పార్టీ ప్రధాన కార్యాలయంలో చక్రవర్తి మీడియాతో మాట్లాడుతూ... ఎన్నికల తర్వాత శశికళ పార్టీ కార్యకలాపాలకు, కార్యక్రమాలకు పూర్తిగా దూరంగా ఉంటున్నారని ఆరోపించారు. పార్టీ నాయకులను గానీ, కార్యకర్తలను గానీ ఆమె కలవడం లేదని, కనీసం తనను కలిసేందుకు కూడా అవకాశం ఇవ్వలేదని ఆవేదన వ్యక్తం చేశారు. "నాతోనే కాదు, పార్టీలోని ఏ ఒక్క కార్యకర్తను కూడా ఆమె కలవలేదు. ఇలాంటి వ్యక్తి పార్టీని ఎలా నడిపిస్తారు? అందుకే ఆమెను తొలగించాలని నిర్ణయించుకున్నాం" అని చక్రవర్తి తెలిపారు.

శశికళ తొలగింపు విషయాన్ని ఇప్పటికే ఎన్నికల సంఘానికి లిఖితపూర్వకంగా తెలియజేశామని చక్రవర్తి తెలిపారు. త్వరలోనే కొత్త ప్రధాన కార్యదర్శిని నియమిస్తామని వెల్లడించారు. ఆస్తుల కేసులో శిక్ష తర్వాత అన్నాడీఎంకే నుంచి బహిష్కరణకు గురైన శశికళ, ఈ ఏడాది ప్రారంభంలో మార్చిలో ఏఐపీటీఎంఎంకే పేరుతో కొత్త పార్టీని స్థాపించిన విషయం తెలిసిందే.