హిమాలయాల్లో ప్రకృతి ప్రకోపం.. అప్రమత్తమైన భారత సరిహద్దు జిల్లాలు

హిమాలయాల్లో ప్రకృతి ప్రకోపం పొంచి ఉంది. భూటాన్‌లోని ఓ హిమ సరస్సు నుంచి ఒక్కసారిగా వరద నీరు ఉప్పొంగడంతో దిగువ ప్రాంతాల్లో ఆందోళన మొదలైంది. ఈ ప్రభావం భారత్‌పైనా పడే ప్రమాదం ఉండటంతో పశ్చిమ బెంగాల్‌, అసోం రాష్ట్రాల్లోని పలు జిల్లాలను అప్రమత్తం చేశారు. నదీ పరివాహక ప్రాంతాల్లో నివసించే ప్రజలు జాగ్రత్తగా ఉండాలని అధికారులు హెచ్చరించారు.

భూటాన్‌లో ఒక్కసారిగా వరద
భూటాన్‌లోని వాయవ్య ప్రాంతం గాసా జిల్లాలో ఉన్న షింటాఫు హిమ సరస్సు వద్ద గురువారం సాయంత్రం ఈ ఘటన చోటుచేసుకుంది. సరస్సు నుంచి ఉప్పొంగిన నీరు మో చు నది మీదుగా దిగువ ప్రాంతాలకు ప్రవహిస్తోంది. ఈ వరదల కారణంగా గాసా త్సాచు ప్రాంతంలోని సహజ వేడి నీటి బుగ్గల వద్ద సౌకర్యాలు పూర్తిగా దెబ్బతిన్నాయి. ముందుగానే ఆ ప్రాంతాన్ని ఖాళీ చేయించడంతో ప్రాణనష్టం జరగలేదు. 

భారత్‌లోని జిల్లాలకు హెచ్చరిక
వరద నీరు భూటాన్‌లోని పునాఖా పట్టణానికి సుమారు ఎనిమిది కిలోమీటర్ల దూరంలో ఉన్న శ్రీగాంగ్‌ ప్రాంతానికి చేరినట్లు సమాచారం. దీంతో దిగువ ప్రాంతాలకు వరద ముప్పు పొంచి ఉందని భూటాన్‌ అధికారులు భారత్‌ను అప్రమత్తం చేశారు. పశ్చిమ బెంగాల్‌లోని డార్జిలింగ్‌ కొండ ప్రాంతాలు, అలీపుర్‌దువార్‌, జల్‌పాయ్‌గురి జిల్లాలతో పాటు అసోంలోని ధుబ్రి జిల్లాలోనూ జాగ్రత్తలు తీసుకోవాలని సూచించారు.

నదీ తీర ప్రాంతాలపై నిఘా
భూటాన్‌లో వరదల ప్రభావం సంకోశ్‌ నదిపై పడే అవకాశం ఉండటంతో అధికారులు అప్రమత్తమయ్యారు. పశ్చిమ బెంగాల్‌లోని అలీపుర్‌దువార్‌ జిల్లాలో నదీ తీర ప్రాంతాల ప్రజలు జాగ్రత్తగా ఉండాలని సూచించారు. అసోంలోనూ పరిస్థితిని పర్యవేక్షిస్తున్నారు. భూటాన్‌లో వరద ఉద్ధృతికి సౌర విద్యుత్తుతో పనిచేసే సాగునీటి వ్యవస్థ దెబ్బతింది. పునాఖా-గాసా రహదారిపైకి వరద వ్యర్థాలు చేరడంతో రాకపోకలకు అంతరాయం ఏర్పడే ప్రమాదం ఉంది.