రెండుసార్లు మృత్యుంజయుడు.. గొడ్డలి వేటుకు గురైన పైలట్ స్మిత్ సర్జరీ ఓ అద్భుతమన్న వైద్యులు!

విమానం కాక్‌పిట్‌లో తోటి పైలట్ గొడ్డలితో దాడి చేసినా ప్రాణాలతో బయటపడి, వందలాది మంది ప్రయాణికులను కాపాడిన భారత పైలట్, కెప్టెన్ స్మిత్ మచ్చర్ అసలైన హీరో అనిపించుకున్నారు. అయితే, ఆ దాడి నుంచి ఆయన బయటపడటమే కాదు, ఆ తర్వాత జరిగిన సర్జరీలోనూ మృత్యువును జయించారు. యూఏఈలో జరిగిన ఓ సన్మాన కార్యక్రమం సందర్భంగా బయటకు వచ్చిన ఆయన ఫొటోలు, తల గాయాల తీవ్రతను, సర్జరీ సంక్లిష్టతను కళ్లకు కట్టాయి. ఆయన తలకు పడిన కుట్లు, గాయం తీరును చూసిన ప్రముఖ న్యూరోసర్జన్లు, స్మిత్ ప్రాణాలతో బయటపడటం ఓ అద్భుతమని అభివర్ణిస్తున్నారు.

ఎందుకంత ప్రమాదకరమైన గాయం?
సెప్టెంబర్ 30న దుబాయ్ నుంచి టెల్ అవీవ్ వెళుతున్న ఫ్లైదుబాయ్ విమానంలో ఈ ఘటన జరిగింది. అల్-ఖైదా భావజాలంతో ప్రభావితుడైన ఒమన్‌కు చెందిన కో-పైలట్ హమామ్ అల్-హమామి, కాక్‌పిట్‌లోని అత్యవసర గొడ్డలితో స్మిత్ తలపై పలుమార్లు దాడి చేశాడు. ఈ దాడిలో స్మిత్ పుర్రె ఎముక లోపలికి చొచ్చుకుపోయింది. దీనిని వైద్య పరిభాషలో 'డిప్రెస్డ్ స్కల్ ఫ్రాక్చర్' అంటారు.

అమెరికాకు చెందిన న్యూరోసర్జన్ డాక్టర్ సనత్ దీక్షిత్ ప్రకారం.. గాయం అయిన చోట మెదడులోని రెండు భాగాల మధ్య ఉండే 'పోస్టీరియర్ సుపీరియర్ సాజిట్టల్ సైనస్' అనే ఒక ప్రధాన రక్తనాళం ఉంటుంది. ఈ రక్తనాళానికి గాయమైతే తీవ్ర రక్తస్రావం జరుగుతుంది. 

సర్జరీ సమయంలో పుర్రె ఎముక ముక్కలను తొలగిస్తుండగా, ఆ రక్తనాళం చిట్లితే కేవలం ఒక్క నిమిషంలోనే దాదాపు రెండు లీటర్ల రక్తం కోల్పోయే ప్రమాదం ఉందని ఆయన హెచ్చరించారు. ఇలాంటి గాయాలకు 40% పైగా మరణం లేదా శాశ్వత వైకల్యం సంభవించే అవకాశం ఉంటుందని వివరించారు.

రెండు మేజర్ ఆపరేషన్లు?
సిడ్నీకి చెందిన న్యూరోసర్జన్ డాక్టర్ సోను భాస్కర్, స్మిత్ తలపై ఉన్న 'క్రాస్' ఆకారపు కుట్ల గుర్తును విశ్లేషించారు. మెదడులో వాపు (స్వెల్లింగ్) ఒత్తిడిని తగ్గించడానికి, సర్జన్లు పుర్రెలో కొంత భాగాన్ని తొలగించి ఉంటారని (డీకంప్రెసివ్ క్రానియెక్టమీ), అది మొదటి సర్జరీ అని అంచనా వేశారు. స్మిత్ ప్రాణాపాయం నుంచి బయటపడిన తర్వాత, తొలగించిన ఎముక భాగాన్ని తిరిగి అమర్చడానికి రెండో సర్జరీ చేసి ఉంటారని అభిప్రాయపడ్డారు. ఈ గాయం కంటి చూపును నియంత్రించే 'విజువల్ కార్టెక్స్'కు సమీపంలో జరగడం కూడా ప్రమాద తీవ్రతను పెంచిందని తెలిపారు.

దాడి నుంచి ఎలా బయటపడ్డారంటే..
తలపై తీవ్ర గాయమై, రక్తస్రావంతో కంటిచూపు మందగించి, స్పృహ కోల్పోతున్నప్పటికీ, కెప్టెన్ స్మిత్ ధైర్యం కోల్పోలేదు. ఆయన అతి కష్టం మీద కాక్‌పిట్ డోర్ తెరవడంతో, సిబ్బంది, ప్రయాణికులు అప్రమత్తమై ఉగ్రవాద కో-పైలట్‌ను బంధించారు. దీంతో పెను ప్రమాదం తప్పింది. విమానంలో ప్రయాణిస్తున్న డాక్టర్ షోటా ముసేవ్ అనే డెంటిస్ట్, విమానాన్ని సౌదీ అరేబియాలో అత్యవసరంగా ల్యాండ్ చేసే వరకు సుమారు 45 నిమిషాల పాటు రక్తస్రావాన్ని అదుపు చేశారు.

సౌదీలో ప్రాథమిక సర్జరీ అనంతరం, స్మిత్‌ను యూఏఈకి తరలించి మెరుగైన చికిత్స అందించారు. ఆయన ధైర్యసాహసాలను గుర్తించిన యూఏఈ ప్రభుత్వం, అక్టోబర్ 27న అబుదాబిలో జరిగిన కార్యక్రమంలో దేశ అత్యున్నత పురస్కారాలలో ఒకటైన 'ఫస్ట్ క్లాస్ ఆర్డర్ ఆఫ్ జాయెద్ II'తో సత్కరించింది. 

ప్రస్తుతం స్మిత్ కోలుకుంటున్నప్పటికీ, భవిష్యత్తులో ఆయన తిరిగి విమానం నడపగలరా లేదా అన్నది వైద్య పరీక్షల తర్వాతే తేలనుంది. ఏదేమైనా ఇంతటి క్లిష్టమైన పరిస్థితుల్లో స్మిత్‌ను కాపాడిన వైద్య బృందం పనితీరు అద్భుతమని నిపుణులు ప్రశంసిస్తున్నారు.