తుపాను ఒక్కోసారి దిశ మార్చుకుంటుంది.. అందుకే ప్రజలను అప్రమత్తం చేస్తున్నాం: సీఎం చంద్రబాబు

"తుపాను ఒక్కోసారి వేగం పుంజుకుంటుంది, ఒక్కోసారి నెమ్మదిస్తుంది, కొన్నిసార్లు అనూహ్యంగా దిశ కూడా మార్చుకుంటుంది. అందుకే ప్రజలు అత్యంత అప్రమత్తంగా ఉండాలి" అని ఆంధ్రప్రదేశ్ ముఖ్యమంత్రి చంద్రబాబు స్పష్టం చేశారు. తీవ్ర తుపాను ముంచుకొస్తున్న నేపథ్యంలో ఆయన మంగళవారం రాత్రి ఉన్నతాధికారులతో సమీక్ష నిర్వహించి, మీడియా సమావేశంలో మాట్లాడారు. ప్రజల ప్రాణాలను కాపాడటమే ప్రభుత్వ ప్రథమ కర్తవ్యమని, ఆస్తి నష్టాన్ని నివారించడం రెండో ప్రాధాన్యత అని ఆయన తేల్చి చెప్పారు.

ప్రస్తుత తుపానును అత్యంత తీవ్రమైనదిగా వాతావరణ శాఖ వర్గీకరించిందని, దీని ప్రభావంతో కోస్తా జిల్లాల్లో భారీ నుంచి అతి భారీ వర్షాలు, తీవ్రమైన గాలులు వీస్తాయని చంద్రబాబు తెలిపారు. "తుపాను బుధవారం ఉదయం 5 నుంచి 9 గంటల మధ్య కాకినాడ-యానాం మధ్య తీరం దాటే అవకాశం ఉంది. తీరం దాటే సమయంలో గంటకు 140 నుంచి 160 కిలోమీటర్ల వేగంతో గాలులు వీయొచ్చు. కొన్నిసార్లు గాలి వేగం 180 కిలోమీటర్లకు కూడా చేరవచ్చు. తుపాను తీరం దాటిన తర్వాత కూడా భారీ వర్షాలు కొనసాగుతాయి. కాబట్టి, ప్రజలు ఎట్టి పరిస్థితుల్లోనూ ఇళ్ల నుంచి బయటకు రావొద్దు," అని ఆయన విజ్ఞప్తి చేశారు.

గత అనుభవాలను గుర్తుచేసుకున్న చంద్రబాబు

ఇలాంటి విపత్తులను ఎదుర్కోవడం తనకు కొత్తేమీ కాదని చెబుతూ, ముఖ్యమంత్రిగా తన సుదీర్ఘ అనుభవాలను చంద్రబాబు గుర్తుచేసుకున్నారు. ముఖ్యంగా 1996-97లో తూర్పు గోదావరి జిల్లాను అతలాకుతలం చేసిన పెను తుపాను, హుదూద్ విలయాన్ని ఆయన ప్రస్తావించారు.

"1996లో వచ్చిన పెను తుపానుకు సుమారు 2,000 మంది ప్రాణాలు కోల్పోయారు. ఆ వార్త తెలియగానే హైదరాబాద్ నుంచి బయలుదేరాను. వాతావరణం అనుకూలించకపోయినా, పైలట్లకు ధైర్యం చెప్పి, అండర్‌టేకింగ్ రాసిచ్చి హెలికాప్టర్‌లో విపత్తు ప్రాంతానికి వెళ్లాను. ముమ్మడివరం, అమలాపురంలో దిగి, 'నేనున్నానంటూ' ప్రజలకు భరోసా ఇచ్చాను. తిరిగి హైదరాబాద్ వెళ్లేందుకు వాతావరణం సహకరించకపోవడంతో విమానాన్ని బెంగళూరుకు మళ్లించారు. అక్కడి నుంచే అప్పటి ప్రధానమంత్రి దేవెగౌడ గారికి ఫోన్ చేసి పరిస్థితిని వివరించి, తక్షణ సాయం కోరాను. ఆ తర్వాత రాజమండ్రినే కేంద్రంగా చేసుకుని, అధికారులను మండలాల వారీగా నియమించి, సహాయక చర్యలు చేపట్టాను. ప్రైవేటు లారీలను సైతం స్వాధీనం చేసుకుని ఎమర్జెన్సీ పనులకు ఉపయోగించాను" అని చంద్రబాబు వివరించారు.

అలాగే హుదూద్ తుపాను సమయంలో విశాఖపట్నం నగరం చిగురుటాకులా వణికిపోయిందని, తాను నేరుగా విశాఖ వెళ్లలేక విజయవాడలో దిగి, రోడ్డు మార్గంలో అక్కడికి చేరుకున్నానని తెలిపారు. "వారం రోజుల పాటు అక్కడే ఉండి, నగరాన్ని తిరిగి గాడిన పెట్టే వరకు విశ్రమించలేదు. పొరుగు రాష్ట్రాల ముఖ్యమంత్రులతో మాట్లాడి కూరగాయలు తెప్పించాను. ఆ అనుభవంతోనే భవిష్యత్తులో ఇలాంటి నష్టం జరగకూడదని విశాఖలో అండర్‌గ్రౌండ్ కేబుల్ వ్యవస్థను ఏర్పాటు చేశాం" అని ఆయన పేర్కొన్నారు. ఈ అనుభవాలన్నింటినీ ఉపయోగించి, టెక్నాలజీని జోడించి ప్రస్తుత విపత్తును ఎదుర్కొంటున్నామని ఆయన ధీమా వ్యక్తం చేశారు.

ప్రజలకు చంద్రబాబు చేసిన ముఖ్య సూచనలు

• తుపాను పూర్తిగా తీరం దాటి, అధికారులు సురక్షితమని చెప్పేవరకు ఎవరూ ఇళ్ల నుంచి బయటకు రావద్దు. ముఖ్యంగా తెల్లవారుజామున కాలకృత్యాల కోసం బయటకు వెళ్లే అలవాటును మానుకోవాలి.
• అన్ని రకాల ప్రయాణాలను పూర్తిగా రద్దు చేసుకోవాలి.
• సెల్‌ఫోన్లు, పవర్‌బ్యాంకులను ముందుగానే ఛార్జ్ చేసి పెట్టుకోవాలి. కొవ్వొత్తులు, నిత్యావసరాలను సిద్ధంగా ఉంచుకోవాలి.
• మత్స్యకారులు సముద్రంలోకి వెళ్లవద్దు. తమ బోట్లను చూసేందుకు కూడా తీరానికి వెళ్లడం ప్రమాదకరం.
• లోతట్టు ప్రాంతాల ప్రజలు, లంక గ్రామాల వారు తక్షణమే పునరావాస కేంద్రాలకు తరలివెళ్లాలి.
• గ్రామాల్లోని యువత, ప్రజలు తమ ఊరి చెరువులకు గండ్లు పడకుండా కాపాడుకోవాలి.
• ఎక్కడైనా చెట్లు, విద్యుత్ స్తంభాలు పడితే వెంటనే కంట్రోల్ రూమ్‌కు సమాచారం ఇవ్వాలి.
• ప్రభుత్వ యంత్రాంగానికి సంపూర్ణంగా సహకరించాలి.

ప్రభుత్వం అన్ని విధాలుగా సిద్ధంగా ఉందని, ఇప్పటికే 84 వేల మందికి పైగా ప్రజలను 2,199 పునరావాస కేంద్రాలకు తరలించామని చంద్రబాబు తెలిపారు. 12 ఎన్డీఆర్ఎఫ్, 10 ఎస్డీఆర్ఎఫ్ బృందాలతో పాటు నేవీ, కోస్ట్‌గార్డ్, పోలీస్, అగ్నిమాపక దళాలు క్షేత్రస్థాయిలో ఉన్నాయని చెప్పారు. వైద్య బృందాలు, అత్యవసర మందులు, విద్యుత్ పునరుద్ధరణ సిబ్బంది, తాగునీటి ట్యాంకర్లు, జనరేటర్లను సిద్ధం చేశామన్నారు. "నేను రాత్రంతా పరిస్థితిని వ్యక్తిగతంగా పర్యవేక్షిస్తాను. ప్రజలు అధైర్యపడొద్దు. ప్రభుత్వం మీకు అండగా ఉంటుంది" అని ఆయన భరోసా ఇచ్చారు.