అమెరికా ఎన్నికలకు మస్క్ భారీ విరాళం.. భారత నిబంధనలతో పోలిస్తే ఆకాశమంత తేడా!

ప్రపంచ కుబేరుడు, టెస్లా అధినేత ఎలాన్ మస్క్ మరోసారి తన భారీ విరాళంతో వార్తల్లో నిలిచారు. అమెరికాలో నవంబర్ 3న జరగనున్న మధ్యంతర ఎన్నికల కోసం రిపబ్లికన్ పార్టీ అభ్యర్థులకు మద్దతిచ్చే రాజకీయ బృందాలకు ఆయన ఏకంగా 445 మిలియన్ డాలర్లకు పైగా (భారత కరెన్సీలో సుమారు రూ.4,234 కోట్లు) విరాళం అందించారు. ఫెడరల్ ఎలక్షన్ కమిషన్ ఫైలింగ్‌ల ఆధారంగా ఈ విషయం వెలుగులోకి వచ్చింది. ఈ భారీ మొత్తం, ప్రపంచంలోని రెండు అతిపెద్ద ప్రజాస్వామ్య దేశాలైన అమెరికా, భారత్‌లలో రాజకీయ నిధుల సేకరణ, ఎన్నికల ఖర్చు నిబంధనల మధ్య ఉన్న తీవ్రమైన వ్యత్యాసాన్ని స్పష్టం చేస్తోంది.

అమెరికాలో అపరిమిత ఖర్చుకు అవకాశం
అమెరికాలో రాజకీయ వ్యయాన్ని భావప్రకటనా స్వేచ్ఛలో భాగంగా పరిగణిస్తారు. అందువల్ల అక్కడ నిధుల సేకరణకు విస్తృత అవకాశాలున్నాయి. 2025-26 ఎన్నికల సైకిల్ కోసం ఒక వ్యక్తి నేరుగా అభ్యర్థికి ఇచ్చే విరాళంపై 3,500 డాల‌ర్ల‌ పరిమితి ఉన్నప్పటికీ, 'సూపర్ పీఏసీ' (పొలిటికల్ యాక్షన్ కమిటీ)ల ద్వారా అపరిమితంగా నిధులు సమీకరించవచ్చు. 

కార్పొరేషన్లు, వ్యక్తులు ఈ సూపర్ పీఏసీలకు ఎంతైనా విరాళం ఇవ్వొచ్చు. అయితే, ఈ సంస్థలు అభ్యర్థుల అధికారిక ప్రచార బృందాలతో సమన్వయం చేసుకోకుండా, స్వతంత్రంగా పనిచేయాలనే నిబంధన ఉంది. ఎలాన్ మస్క్ తన విరాళాల్లో అధిక భాగాన్ని 'అమెరికా పీఏసీ', 'సెనేట్ లీడర్‌షిప్ ఫండ్' వంటి సూపర్ పీఏసీలకే అందించారు. ఇవి తమకు నచ్చిన అభ్యర్థుల తరఫున భారీగా ప్రకటనలు గుప్పిస్తూ, ప్రచారం నిర్వహిస్తాయి.

భారత్‌లో కఠినమైన ఖర్చు పరిమితులు
అమెరికా విధానానికి పూర్తి భిన్నంగా, భారత్‌లో ఎన్నికల వ్యయంపై కేంద్ర ఎన్నికల సంఘం కఠినమైన పరిమితులు విధించింది. ఇక్కడ అభ్యర్థుల ఎన్నికల ఖర్చుపై స్పష్టమైన పరిమితులు ఉన్నాయి. పెద్ద రాష్ట్రాల్లో ఒక పార్లమెంట్ అభ్యర్థి గరిష్ఠంగా రూ.95 లక్షలు మాత్రమే ఖర్చు చేయగలరు. 

చిన్న రాష్ట్రాలు, కొన్ని కేంద్ర పాలిత ప్రాంతాల్లో ఈ పరిమితి రూ.75 లక్షలుగా ఉంది. అదేవిధంగా, అసెంబ్లీ ఎన్నికల విషయానికొస్తే, పెద్ద రాష్ట్రాల్లో అభ్యర్థి గరిష్ఠ వ్యయ పరిమితి రూ.40 లక్షలు కాగా, చిన్న రాష్ట్రాల్లో ఇది రూ.28 లక్షలుగా నిర్ధారించారు. అభ్యర్థులు తమ ఎన్నికల ఖర్చుకు సంబంధించిన పూర్తి వివరాలను ఎన్నికల సంఘానికి తప్పనిసరిగా సమర్పించాలి.

ఇతర దేశాల్లోనూ నియంత్రణ
కేవలం భారత్ మాత్రమే కాదు, యూకే, కెనడా, జర్మనీ వంటి అనేక ఇతర ప్రజాస్వామ్య దేశాలు కూడా రాజకీయ విరాళాలు, ఎన్నికల ఖర్చుపై అమెరికా కంటే కఠినమైన నిబంధనలను అమలు చేస్తున్నాయి. ఆ దేశాల్లో ఎన్నికల ప్రక్రియలో ధన ప్రవాహాన్ని నియంత్రించి, అభ్యర్థులందరికీ సమాన అవకాశాలు కల్పించేందుకు ప్రాధాన్యం ఇస్తారు. మస్క్ భారీ విరాళం నేపథ్యంలో అమెరికాలో డబ్బు రాజకీయాలను ఏ స్థాయిలో ప్రభావితం చేస్తుందో, అదే సమయంలో భారత్ వంటి దేశాలు ఎన్నికల ఖర్చును నియంత్రించడానికి ఎలాంటి పకడ్బందీ చర్యలు తీసుకుంటున్నాయో స్పష్టంగా అర్థమవుతోంది.