రెండేళ్ల వయసులోనే రికార్డు.. తబలాతో అద్భుతం చేసిన చిన్నారి.. వీడియో వైరల్

కర్ణాటకకు చెందిన ఓ చిన్నారి అరుదైన ఘనత సాధించింది. కేవలం రెండు సంవత్సరాల పది నెలల వయసులోనే తబలా వాయించి 'ఇండియా బుక్ ఆఫ్ రికార్డ్స్‌'లో స్థానం సంపాదించుకుంది. అత్యంత పిన్న వయస్కురాలైన తబలా కళాకారిణిగా రికార్డు సృష్టించి అందరినీ ఆశ్చర్యపరుస్తోంది.

వివరాల్లోకి వెళితే, కర్ణాటకలోని ఉత్తర కన్నడ జిల్లా, హొన్నవర ప్రాంతానికి చెందిన స్వరశ్రీ హెగ్డే ఈ అద్భుతాన్ని చేసింది. ఈ చిన్నారి 12 రకాల తాళాలను వాటి స్వర శైలి సహా ఎలాంటి తప్పులు లేకుండా పఠిస్తూ, వాయించి ఈ రికార్డును సొంతం చేసుకుంది.

స్వరశ్రీ తండ్రి గురురాజ్ హెగ్డే ఒక ప్రముఖ తబలా విద్వాంసుడు కాగా, తల్లి శ్రీలత హిందుస్తానీ గాయని, ఇంగ్లిష్ ప్రొఫెసర్. తమ కుమార్తె ఏడాది వయసు నుంచే తబలాపై ఆసక్తి చూపిందని, దానిపైనే నిద్రపోయేదని తల్లిదండ్రులు తెలిపారు. ఆమె ఆసక్తిని గమనించి, తండ్రి తన ఇతర విద్యార్థులకు పాఠాలు చెబుతున్నప్పుడు స్వరశ్రీని పక్కనే కూర్చోబెట్టుకుని శిక్షణ ఇచ్చారు. ఆమె కోసం ప్రత్యేకంగా రెండు చిన్న తబలాలను కూడా తయారు చేయించారు.

ప్రస్తుతం స్వరశ్రీ తబలా వాయిస్తున్న వీడియోలు సోషల్ మీడియాలో వైరల్ అవుతున్నాయి. ఇంత చిన్న వయసులోనే ఆమె ఏకాగ్రత, లయబద్ధతను చూసి నెటిజన్లు ప్రశంసల వర్షం కురిపిస్తున్నారు.