హైదరాబాద్ రిటైర్డ్ ఐపీఎస్ అధికారి భార్య హత్య కేసు: ఐదు నెలల తర్వాత నేపాలీ ముఠా అరెస్ట్

హైదరాబాద్ నగరంలో తీవ్ర సంచలనం సృష్టించిన రిటైర్డ్ ఐపీఎస్ అధికారి రే వినయ్ రంజన్ భార్య తనుజా రంజన్ హత్య కేసులో ఐదు నెలల తర్వాత కీలక పురోగతి లభించింది. ఈ దారుణానికి సూత్రధారిగా వ్యవహరించిన ఇంట్లోని పనిమనిషి ధర్మ అలియాస్ కల్పన సహా నలుగురు నేపాలీ నిందితులను పోలీసులు సోమవారం అరెస్ట్ చేశారు. ఈ కేసు దర్యాప్తు కోసం ఏర్పాటు చేసిన ప్రత్యేక దర్యాప్తు బృందం (SIT) దేశవ్యాప్తంగా పలు రాష్ట్రాల్లో, భారత్-నేపాల్ సరిహద్దుల్లో ఐదు నెలల పాటు గాలించి నిందితులను కదలికలను గుర్తించారు.

హైదరాబాద్ పోలీస్ కమిషనర్ వి.సి. సజ్జనార్ సోమవారం మీడియా సమావేశంలో ఈ అరెస్టుల వివరాలను వెల్లడించారు. నిందితులైన ధర్మ అలియాస్ కల్పన (26), గణేశ్ బి.కె (31), చంద్ర బహదూర్ థమన్ (44), గణేశ్ బహదూర్ షాహి (37)లను అరెస్ట్ చేసినట్లు తెలిపారు. ఈ కేసుతో సంబంధం ఉన్న మరో ఇద్దరు నిందితులు పరారీలో ఉన్నారని, వారి కోసం గాలింపు కొనసాగుతోందని చెప్పారు.

పక్కా ప్రణాళికతో దోపిడీ, హత్య
పోలీసులు తెలిపిన వివరాల ప్రకారం.. మే 7, 8 తేదీల మధ్య రాత్రి ప్రశాసన్ నగర్‌లోని తనూజ రంజన్ నివాసంలోకి చొరబడిన నిందితులు, ఆమెను కదలకుండా బంధించి, ఊపిరాడకుండా చేసి హత్య చేశారు. అనంతరం ఇంట్లోని 225 గ్రాముల బంగారు ఆభరణాలు, ఇతర విలువైన వస్తువులతో పరారయ్యారు.

ఈ కేసులో ఇంట్లో పనిచేసే ధర్మ తిరువా అలియాస్ కల్పన (26) కీలక పాత్ర పోషించింది. నేపాల్‌లోని సుర్ఖేత్ జిల్లాకు చెందిన కల్పన, జూన్ 2025లో బంధువుల ద్వారా హైదరాబాద్ వచ్చి, నెలకు రూ. 20,000 జీతానికి తనూజ ఇంట్లో పనికి కుదిరింది. పనిలో చేరినప్పటి నుంచి పుణెలో ఉంటున్న బికాస్ అనే నేపాల్ జాతీయుడితో ఆమె టచ్‌లో ఉంది. యజమానురాలి ఇంట్లో ఉన్న ఆస్తులు, నగదు, బంగారు ఆభరణాల గురించి బికాస్ తరచూ అడిగి తెలుసుకునేవాడు. ఇంట్లో దోపిడీకి సహకరిస్తే వాటా ఇస్తానని ఆశ చూపడంతో కల్పన అంగీకరించింది.

నేరానికి ముందు ఏం జరిగింది?
ఏప్రిల్ 2026లో అనారోగ్యంతో ఉన్న తన తండ్రిని చూసేందుకు పుణే వెళ్లిన కల్పన, అక్కడ ఈ ముఠాలోని ఇతర సభ్యులను కలుసుకుంది. మే 4న యజమానురాలు తనూజ బెంగళూరు వెళ్తున్నట్టు తెలియగానే, కల్పన వెంటనే ముఠాకు సమాచారం ఇచ్చింది. దీంతో మహారాష్ట్రలోని రాయగడ్ జిల్లాలో గణేశ్ బహదూర్ షాహి, శంకర్ చంద్ర లామా, సునీల్ పరియార్ సమావేశమై, అద్దెకు తీసుకున్న మారుతి ఎర్టిగా కారులో పుణే చేరుకున్నారు. అక్కడ మరికొందరితో కలిసి హైదరాబాద్‌కు ప్రయాణమయ్యారు.

మే 7న ఉదయం, గణేష్ బి.కె., సురేష్ షాహి అనే ఇద్దరు నిందితులు కల్పనను కలిసి ఇంటి పరిసరాలను పరిశీలించారు. ఇంట్లోకి ఎలా ప్రవేశించాలనే దానిపై చర్చించుకున్నారు. అదే రోజు సాయంత్రం మహాత్మా గాంధీ బస్ స్టేషన్ సమీపంలోని రవీంద్ర బార్ వద్ద ముఠా సభ్యులందరూ సమావేశమై, సుజన్ షాహి అలియాస్ సురేష్ షాహి నేతృత్వంలో రెండు బృందాలుగా విడిపోయారు. గణేష్ బి.కె., సురేష్ షాహి, శంకర్ లామా దోపిడీ చేసేందుకు ఇంట్లోకి వెళ్లాలని, గణేష్ బహదూర్ షాహి, సునీల్ పరియార్, నేత్ర షాహి బయట నాంపల్లి రైల్వే స్టేషన్ వద్ద కాపలా కాయాలని నిర్ణయించుకున్నారు.

సుదీర్ఘ దర్యాప్తు, అరెస్టులు
ప్రణాళిక ప్రకారం, మే 7 రాత్రి కల్పన ఇంటి తలుపులు తీసి ముఠా సభ్యులను లోపలికి అనుమతించింది. ఆ సమయంలో శబ్దం విని మేల్కొన్న తనూజను నిందితులు బంధించి, ఊపిరాడకుండా చేసి చంపేశారు. అనంతరం ఇంట్లోని బీరువాలు పగలగొట్టి బంగారం, విలువైన వస్తువులు తీసుకుని వెనుక గేటు నుంచి పారిపోయారు. నాంపల్లి వద్ద కాపలా ఉన్న బృందాన్ని కలుసుకుని, కాజీపేట వైపు పారిపోయారు. అక్కడ ఒక కొండ ప్రాంతానికి చేరుకుని, దోచుకున్న సొత్తును తొమ్మిది సమాన భాగాలుగా పంచుకుని, చిన్న చిన్న బృందాలుగా విడిపోయి నేపాల్‌కు పారిపోయారు.

ఈ కేసుపై దృష్టి సారించిన సిట్, మే 22న సునీల్ బహదూర్, దొంగ సొత్తు కొనుగోలు చేసిన దిలీప్ బహదూర్‌ను అరెస్ట్ చేసి, వారి నుంచి 26 గ్రాముల బంగారం స్వాధీనం చేసుకుంది. అనంతరం బెంగళూరు, ముంబై, పుణె, సూరత్, పాట్నా, ఢిల్లీ, లక్నో, ఉత్తరాఖండ్‌లలో ఐదు నెలలకు పైగా దర్యాప్తు చేపట్టింది. నేపాల్ సరిహద్దులోని మారుమూల ప్రాంతాల్లో స్థానిక సమాచారం సహాయంతో నిందితుల కదలికలను గుర్తించి, సోమవారం నాడు ప్రధాన నిందితులైన కల్పన, గణేశ్ బి.కె., చంద్ర బహదూర్ తమాంగ్, గణేశ్ బహదూర్ షాహిలను అరెస్ట్ చేసింది. పరారీలో ఉన్న మరో ఇద్దరి కోసం గాలింపు చర్యలు కొనసాగుతున్నాయని పోలీసులు తెలిపారు.