యుద్ధమా? శాంతా?.. ఇరాన్ విషయంలో ట్రంప్ మాటలతో పెరిగిన ఉత్కంఠ!

అమెరికా, ఇరాన్ మధ్య కొనసాగుతున్న తీవ్ర ఉద్రిక్తతల నడుమ అమెరికా అధ్యక్షుడు డొనాల్డ్ ట్రంప్ సంచలన వ్యాఖ్యలు చేశారు. ఇరాన్‌పై ఇవాళే (ఆదివారం) సైనిక దాడి చేసే అవకాశం ఉందని, అదే సమయంలో ఓ పెద్ద దౌత్య ఒప్పందం కుదిరేందుకూ ఆస్కారం ఉందని పేర్కొన్నారు. ఆయన మాటలతో రాబోయే పరిణామాలపై ప్రపంచవ్యాప్తంగా ఉత్కంఠ నెలకొంది.

ఫ్లోరిడాలో మధ్యంతర ఎన్నికల్లో తన ఓటు హక్కు వినియోగించుకున్న అనంతరం ట్రంప్ విలేకరులతో మాట్లాడారు. ఇరాన్‌పై దాడి చేసే ప్రణాళికలు ఏమైనా ఉన్నాయా అని విలేకరులు ప్రశ్నించగా.. ఆయన ఆసక్తికరమైన సమాధానం ఇచ్చారు. "సైనిక ప్రణాళికల గురించి నేను బయటకు చెప్పను. కానీ, బహుశా రేపే దాడి ఉండొచ్చు. నాకు ఆ అవకాశం ఉంది. 

అదే సమయంలో, ఓ మంచి, పెద్ద, అందమైన ఒప్పందం కుదిరేందుకూ ఆస్కారం ఉంది" అని ట్రంప్ తెలిపారు. ఇరాన్ ఒక ఒప్పందం చేసుకోవాలని కోరుకుంటోందని, అయితే ఆ ఒప్పందానికి వారు కట్టుబడి ఉంటారా అన్నదే అసలు సమస్య అని ఆయన అనుమానం వ్యక్తం చేశారు.

ఒకరోజు ముందే ట్రంప్ మాట్లాడుతూ.. ఇరాన్‌పై గతంలో అమెరికా నిర్వహించిన సైనిక ఆపరేషన్ల పేరును ప్రస్తావిస్తూ "మరో చిన్న 'ఎపిక్ ఫ్యూరీ' ఉండొచ్చు" అని సంకేతాలు ఇచ్చారు. వారాంతంలో దాడి జరిగే అవకాశం ఉందని ఒక అమెరికా రాయబారి కూడా సూచించడం ఈ వ్యాఖ్యలకు బలం చేకూర్చింది.

ఈ ఏడాది ప్రారంభంలో అమెరికా, ఇజ్రాయెల్ కలిసి ఇరాన్‌పై ఉమ్మడిగా దాడులు చేయడంతో ఈ ఘర్షణ వాతావరణం మొదలైంది. అనంతరం జూన్‌లో ఇరు దేశాల మధ్య కుదిరిన ఒక తాత్కాలిక ఒప్పందం విఫలం కావడంతో అప్పటి నుంచి ఇరు దేశాల మధ్య ఉద్రిక్తతలు తీవ్ర‌ స్థాయిలో కొనసాగుతున్నాయి. ఇరాన్ అణ్వాయుధాన్ని సొంతం చేసుకోకుండా నిరోధించడమే తమ ప్రధాన లక్ష్యమని, గతంలో తీసుకున్న చర్యలు కూడా అందులో భాగమేనని ట్రంప్ మరోసారి స్పష్టం చేశారు.