విజయవాడ టీడీపీలో రెబల్స్‌పై వేటు.. ఏడుగురు నేతల సస్పెన్షన్!

ఏపీలో స్థానిక సంస్థల ఎన్నికల వేళ టీడీపీ క్రమశిక్షణ చర్యలు చేపట్టింది. విజయవాడ కార్పొరేషన్‌లో కూటమి ధర్మానికి విరుద్ధంగా వ్యవహరిస్తూ, రెబల్స్‌గా పోటీ చేస్తున్న ఏడుగురు నేతలను పార్టీ నుంచి సస్పెండ్ చేస్తున్నట్లు ప్రకటించింది. పార్టీ వ్యతిరేక కార్యకలాపాలకు పాల్పడినందుకే ఈ కఠిన నిర్ణయం తీసుకున్నట్లు స్పష్టం చేసింది.

సస్పెండైన వారిలో కాకొల్లు మహేంద్ర నాథ్ (బాబీ), దేవరపు మాల్యాద్రి, గెడ్డం శ్రీనివాసరావు, కోట నారాయణ, చంద్రశేఖర్, కొమ్మినేని సురేశ్‌, మాదాల సత్యవతి ఉన్నారు. ఈ నేతలతో టీడీపీకి ఇకపై ఎలాంటి సంబంధం లేదని స్పష్టం చేసింది.

ఎందుకీ సస్పెన్షన్?
స్థానిక సంస్థల ఎన్నికల్లో భాగంగా టీడీపీ, జనసేన, బీజేపీ కూటమిగా పోటీ చేస్తున్నాయి. ఈ క్రమంలో విజయవాడ కార్పొరేషన్‌లోని కొన్ని డివిజన్లను పొత్తులో భాగంగా జనసేన, బీజేపీలకు కేటాయించారు. అయితే, టీడీపీ నుంచి టికెట్ ఆశించి భంగపడిన కొందరు నేతలు అసంతృప్తికి గురై రెబల్స్‌గా, స్వతంత్ర అభ్యర్థులుగా బరిలోకి దిగారు.

ముఖ్యంగా 69వ డివిజన్‌ను కూటమి ఒప్పందంలో భాగంగా జనసేన పార్టీకి కేటాయించారు. అక్కడ టీడీపీ టికెట్ ఆశించిన కాకొల్లు మహేంద్రనాథ్ (బాబీ) పార్టీ ఆదేశాలను ధిక్కరించి రెబల్‌గా నామినేషన్ వేశారు. నామినేషన్ ఉపసంహరించుకోవాలని పార్టీ సూచించినా ఆయన పట్టించుకోలేదు. 

అలాగే, 1వ డివిజన్‌లో టీడీపీ అధికారిక అభ్యర్థి గుడిపాటి సౌజన్య కాగా, భార్యకు టికెట్ ఆశించిన కొమ్మినేని సురేశ్‌, మాదాల సత్యవతి వంటి వారు స్వతంత్రులుగా పోటీకి దిగారు.

ఈ రెబల్ అభ్యర్థులకు సహకరిస్తున్న వారిని కూడా పార్టీ గుర్తించింది. మహేంద్రనాథ్‌తో పాటు ఆయనకు మద్దతిస్తున్న దేవరపు మాల్యాద్రి, గెడ్డం శ్రీనివాసరావు, కోట నారాయణ, చంద్రశేఖర్‌లను కూడా పార్టీ నుంచి సస్పెండ్ చేసింది. కూటమి ధర్మాన్ని పాటించని వారిపై కఠినంగా వ్యవహరిస్తామని ఈ చర్యల ద్వారా పార్టీ అధిష్ఠానం స్పష్టమైన సంకేతాలు పంపింది.