'పీరియడ్స్ ఆగవు కదా'.. మహిళల సవాళ్లపై చర్చ రేకెత్తించిన యువ‌ పర్వతారోహకురాలి వీడియో!

సాహస యాత్రలు చేసే మహిళలు ఎన్నో సవాళ్లను ఎదుర్కొంటారు. వాతావరణం, శారీరక శ్రమ వంటివి అందరికీ సాధారణమే అయినా, వారికి మాత్రమే ఎదురయ్యే కొన్ని ప్రత్యేకమైన ఇబ్బందులు ఉంటాయి. అలాంటి ఓ సమస్యనే ధైర్యంగా అధిగమించి, ఆ అనుభవాన్ని ప్రపంచంతో పంచుకున్నారు పర్వతారోహకురాలు యోగేశ్వరి బొహరే. 

16,000 అడుగుల ఎత్తులో పర్వతారోహణ చేస్తుండగా, ఆమెకు అనూహ్యంగా పీరియడ్స్ ప్రారంభమయ్యాయి. ఆ సమయంలో తన వద్ద శానిటరీ ప్యాడ్లు లేకపోవడంతో అందుబాటులో ఉన్న వస్తువులతోనే తాత్కాలిక ప్యాడ్ తయారు చేసుకున్నారు. ఈ మొత్తం ప్రక్రియను వీడియో తీసి తన ఇన్‌స్టాగ్రామ్ ఖాతాలో పోస్ట్ చేయగా, అది ఇప్పుడు సోషల్ మీడియాలో వైరల్‌గా మారింది.

ఏం జరిగిందంటే?
పర్వతారోహణ యాత్రలో భాగంగా యోగేశ్వరి 16,000 అడుగుల ఎత్తున ఉన్నప్పుడు, రాత్రికి రాత్రే ఆమెకు నెలసరి మొదలైంది. యాత్ర ముగియడానికి మరో నాలుగు, ఐదు రోజులు పట్టేలా ఉండగా, ఆమె బృందంలో సాయం చేయడానికి మరో మహిళ కూడా లేరు. దీంతో ఏం చేయాలో పాలుపోని స్థితిలో, తన వద్ద ఉన్న వస్తువులతోనే పరిష్కారం కనుగొనాలని నిర్ణయించుకున్నారు.

అందుబాటులో ఉన్న కొన్ని టిష్యూ పేపర్లను ఒకదానిపై ఒకటి పొరలుగా పేర్చి, మందంగా మడిచారు. అది విడిపోకుండా ఉండేందుకు దాని అంచులకు మెడికల్ టేపును అతికించారు. అలా తయారైన తాత్కాలిక శానిటరీ ప్యాడ్‌ను కెమెరాకు చూపిస్తూ, "ఇది ఎంతవరకు పనిచేస్తుందో చూడాలి" అని తన అనుభవాన్ని వివరించారు.

మనుగడను నేర్పిన పర్వతాలు
ఈ వీడియోను పంచుకుంటూ యోగేశ్వరి ఒక స్ఫూర్తిదాయక సందేశాన్ని ఇచ్చారు. "పర్వతాలు మనకు కేవలం ఎక్కడాన్నే నేర్పించవు. కష్ట సమయాల్లో ఎలా మనుగడ సాగించాలో, పరిస్థితులకు అనుగుణంగా ఎలా మారాలి, సమస్యలకు పరిష్కారాలు ఎలా కనుక్కోవాలో కూడా నేర్పిస్తాయి" అని ఆమె తన పోస్టులో రాశారు. 

సాహస యాత్రల్లో ఉన్నప్పుడు పీరియడ్స్ ఆగవని, కానీ పర్వతారోహణలో మహిళలు ఎదుర్కొనే ఇలాంటి సవాళ్ల గురించి చాలా అరుదుగా చర్చిస్తారని ఆమె అభిప్రాయపడ్డారు. బహిరంగంగా మాట్లాడటానికి సంకోచించే ఇలాంటి విషయాలపై చర్చ జరగాలనే ఉద్దేశంతోనే ఈ వీడియోను పంచుకున్నట్లు తెలిపారు.

ఆమె పోస్టుకు సోషల్ మీడియాలో విశేషమైన స్పందన లభించింది. ఎంతోమంది నెటిజన్లు ఆమె ధైర్యాన్ని, సమయస్ఫూర్తిని ప్రశంసిస్తూ కామెంట్లు పెట్టారు. "చాలా ధైర్యవంతురాలు", "మోర్ పవర్ టు యు గర్ల్" అంటూ మరికొందరు ఆమెకు మద్దతు తెలిపారు. యోగేశ్వరి వీడియో కేవలం ఒక తాత్కాలిక పరిష్కారాన్ని చూపడమే కాకుండా, మహిళల ఆరోగ్య సమస్యలపై ఉన్న గోప్యతను ఛేదించి, స్ఫూర్తిదాయక చర్చకు తెరలేపింది.