సీఈసీ రాజీనామా డిమాండ్.. ఢిల్లీలో హైడ్రామా.. సీజేపీ నేతల విడుద‌ల‌

ప్రధాన ఎన్నికల కమిషనర్ (సీఈసీ) జ్ఞానేష్ కుమార్ రాజీనామా చేయాలని డిమాండ్ చేస్తూ నిరసన చేపట్టేందుకు ఢిల్లీకి వచ్చిన 'కాక్రోచ్ జనతా పార్టీ' (సీజేపీ) నేతలను పోలీసులు విడుదల చేశారు. నిన్న‌ ఎయిర్ ఇండియా విమానంలో నాటకీయ పరిణామాల మధ్య అదుపులోకి తీసుకున్న అభిజీత్ దిప్కే, సౌరవ్ దాస్, అశుతోష్ రాంకా ఈరోజు విడుదలయ్యారు. ఈ నిరసనకు ముందే గురుగ్రామ్‌లో అదుపులోకి తీసుకున్న ప్రముఖ యూట్యూబర్, ఇన్‌ఫ్లుయెన్సర్ ధ్రువ్ రాఠీని కూడా పోలీసులు తెల్లవారుజామున 3 గంటలకు విడిచిపెట్టారు.

నిన్న‌ ముంబై నుంచి ఢిల్లీకి వచ్చిన ఎయిర్ ఇండియా విమానం ల్యాండ్ అయిన కొద్ది నిమిషాలకే ఈ నాటకీయ ఘటన చోటుచేసుకుంది. వాణిజ్య విమానంలో ఇలాంటి దృశ్యాలు చాలా అరుదుగా కనిపిస్తాయి. విమానం టచ్‌డౌన్ అయిన వెంటనే, మహిళా సిబ్బందితో కూడిన ఢిల్లీ పోలీసుల బృందం విమానంలోకి ప్రవేశించి సీజేపీ నేతలు ముగ్గురినీ అదుపులోకి తీసుకునేందుకు ప్రయత్నించింది. ఆ సమయంలో విమానంలోని తోటి ప్రయాణికులు ఆశ్చర్యపోయి, తమ మొబైల్ ఫోన్లలో ఈ దృశ్యాలను వీడియో తీశారు.

ఈ సందర్భంగా పోలీసు అధికారులతో అభిజీత్ దిప్కే వాగ్వాదానికి దిగారు. తాను అరెస్ట్ కావడానికే ఢిల్లీకి వచ్చానని ఆయన ఆగ్రహంతో అధికారులతో చెప్పడం వీడియోల్లో రికార్డయింది. అనంతరం ముగ్గురు నేతలను అదుపులోకి తీసుకున్న పోలీసులు, ఢిల్లీ కంటోన్మెంట్‌లోని అడిషనల్ సిటీ మేజిస్ట్రేట్ (ఏసీఎం) కోర్టులో హాజరుపరిచారు. కోర్టు ఆదేశాల మేరకు ఇవాళ‌ వారిని విడుదల చేశారు. సీఈసీకి వ్యతిరేకంగా తలపెట్టిన నిరసనకు ముందే చోటుచేసుకున్న ఈ వరుస అరెస్టులు, విడుదలలు ఢిల్లీలో చర్చనీయాంశమయ్యాయి.