రైలు కంపార్ట్‌మెంట్‌లో పాము.. 'జంగిల్ సఫారీ' అంటూ కేంద్రంపై కాంగ్రెస్ సెటైర్లు

ఓ రైలు కంపార్ట్‌మెంట్‌లో పాము ప్రత్యక్షం కావడం ప్రయాణికులను తీవ్ర భయాందోళనకు గురిచేసింది. ఈ ఘటనకు సంబంధించిన వీడియోను సోషల్ మీడియాలో పంచుకున్న కాంగ్రెస్ పార్టీ, కేంద్ర ప్రభుత్వంపై, రైల్వే శాఖ మంత్రిపై వ్యంగ్యాస్త్రాలు సంధించింది. ఇది రైలు ప్రయాణం కాదని, రైల్వే శాఖ అందిస్తున్న 'జంగిల్ సఫారీ' అని ఎద్దేవా చేసింది.

ఈ మేరకు కాంగ్రెస్ పార్టీ తమ అధికారిక సోషల్ మీడియా ఖాతాలో ఓ వీడియోను పోస్ట్ చేసింది. ఆ వీడియోలో రైలు బోగీలోని ఓ బెర్త్ కింద పాము కదులుతూ కనిపించింది. ఈ వీడియోకు ఘాటైన వ్యాఖ్యను జోడించింది. "ఇకపై భారతీయ రైల్వేలో 'జంగిల్ సఫారీ' థ్రిల్‌ను కూడా పొందండి. అవును.. ఇదిగో రైల్లో మీతో ప్రయాణిస్తున్న ఈ సర్ప రాజు మీకు ఆ థ్రిల్‌ను అందిస్తాడు. ప్రయాణికుల భద్రతకు వాళ్లే బాధ్యులు. ఎందుకంటే, బలవంతంగా ఛార్జీలు పిండుకునే 'రీల్ మినిస్టర్'కు మీ ప్రాణాలంటే ఏమాత్రం లెక్కలేదు" అని కాంగ్రెస్ తీవ్రంగా విమర్శించింది.

ప్రస్తుతం ఈ వీడియో సోషల్ మీడియాలో వైరల్‌గా మారింది. ప్రయాణికుల భద్రత విషయంలో రైల్వే శాఖ నిర్లక్ష్యంగా వ్యవహరిస్తోందనడానికి ఇదే నిదర్శనమని పలువురు నెటిజన్లు, విపక్ష నేతలు కామెంట్లు చేస్తున్నారు.