హైదరాబాద్‌లో విషాద ఘటన.. హాస్టల్ భవనంపై నుంచి దూకి టెక్కీ ఆత్మహత్య

హైదరాబాద్‌లో ఓ సాఫ్ట్‌వేర్ ఉద్యోగి ఆత్మహత్యకు పాల్పడ్డాడు. మాదాపూర్ పోలీస్ స్టేషన్ పరిధిలో చోటుచేసుకున్న ఈ ఘటనలో 23 ఏళ్ల యువకుడు తాను నివసిస్తున్న హాస్టల్ భవనం పైనుంచి దూకి ప్రాణాలు తీసుకున్నాడు.

పోలీసులు తెలిపిన వివరాల ప్రకారం, శ్రీకాకుళం జిల్లా పాతపట్నంకు చెందిన యశ్వంత్ (23) గచ్చిబౌలిలోని ఒక సాఫ్ట్‌వేర్ సంస్థలో ఉద్యోగం చేస్తున్నాడు. వృత్తిరీత్యా పది రోజుల క్రితమే అతడు మాదాపూర్‌లోని ఒక కో-లివింగ్ హాస్టల్‌లో చేరాడు.

మంగళవారం తనకు ఆరోగ్యం బాగాలేదని యశ్వంత్ హాస్టల్ సిబ్బందికి తెలిపినట్లు సమాచారం. ఆ తర్వాత కొద్దిసేపటికే అతడు భవనం పైకి వెళ్లి అక్కడ నుంచి కిందకు దూకేశాడు. ఈ ఘటనలో తీవ్ర గాయాలపాలైన యశ్వంత్ అక్కడికక్కడే మృతి చెందాడు.

సమాచారం అందుకున్న మాదాపూర్ పోలీసులు ఘటనా స్థలానికి చేరుకుని పరిశీలించారు. అనంతరం మృతదేహాన్ని పోస్టుమార్టం నిమిత్తం ఉస్మానియా జనరల్ ఆసుపత్రికి తరలించారు. ఈ ఘటనపై కేసు నమోదు చేసిన పోలీసులు, యశ్వంత్ ఆత్మహత్యకు దారితీసిన కారణాలపై దర్యాప్తు చేపట్టారు. మృతుని కుటుంబ సభ్యులకు సమాచారం అందించారు.