న్యూయార్క్‌లో విషాదం.. ఇద్దరు భారత సంతతి యువతీయువకుల మృతి

అమెరికాలోని న్యూయార్క్‌లో అత్యంత విషాదకరమైన సంఘటన చోటుచేసుకుంది. ప్రమాదవశాత్తు సబ్‌వే ట్రాక్‌పై పడిపోయిన స్నేహితుడిని కాపాడేందుకు సాహసోపేతంగా దూకిన భారత సంతతి యువతి, అతనితో పాటే రైలు కిందపడి ప్రాణాలు కోల్పోయింది. ఇద్దరు యువత భవిష్యత్తు అర్ధాంతరంగా ముగిసిపోవడం వారి కుటుంబాల్లో, స్నేహితుల్లో తీవ్ర విషాదాన్ని నింపింది.

పోలీసులు తెలిపిన వివరాల ప్రకారం.. ఈ ఘటన స్థానిక కాలమానం ప్రకారం ఆదివారం తెల్లవారుజామున మాన్‌హట్టన్‌లోని ఓ మెట్రో స్టేషన్‌లో జరిగింది. భారత సంతతికి చెందిన నవమ్ కౌల్, మలైకా చిత్రే అనే ఇద్దరు స్నేహితులు రైలు కోసం వేచి చూస్తున్నారు. 

ఈ క్రమంలో నవమ్ కౌల్ అదుపుతప్పి రైలు పట్టాలపై పడిపోయాడు. అది గమనించిన మలైకా చిత్రే అతడిని రక్షించేందుకు ఏమాత్రం ఆలోచించకుండా వెంటనే ట్రాక్‌పైకి దూకింది. అయితే, వారిద్దరూ పైకి ఎక్కేలోపే వేగంగా వచ్చిన రైలును ఆపడం డ్రైవర్‌కు సాధ్యం కాలేదు. దీంతో ఇద్దరూ అక్కడికక్కడే దుర్మరణం పాలయ్యారు.

మృతులిద్దరూ న్యూజెర్సీలోని సమీప పట్టణాల్లో పెరిగారు. 2024లోనే ఇద్దరూ ప్రతిష్ఠాత్మక రట్జర్స్ యూనివర్సిటీ నుంచి గ్రాడ్యుయేషన్ పూర్తి చేసుకున్నారు. నవమ్ కౌల్ కుటుంబం నేపాల్ నుంచి వలస వచ్చి అమెరికాలో స్థిరపడింది. అతడు బిజినెస్ డిగ్రీ పూర్తి చేసి, ప్రముఖ ఆర్థిక సేవల సంస్థ బ్లూమ్‌బర్గ్‌లో డేటా అనలిస్ట్‌గా పనిచేస్తున్నాడు. 

ఇక మలైకా చిత్రే, టెంపుల్ యూనివర్సిటీలో ఫార్మసీలో డాక్టరేట్ చేస్తూనే అకాడియా ఫార్మాస్యూటికల్స్‌లో క్వాలిటీ ఆపరేషన్స్ స్పెషలిస్ట్‌గా పనిచేస్తోంది.

ఈ ఘటనపై కొందరు మీడియా సంస్థలు వాస్తవాలు తెలుసుకోకుండా ఊహాగానాలతో కూడిన కథనాలు ప్రసారం చేయడంపై మలైకా చిత్రే కుటుంబ సభ్యులు తీవ్ర ఆగ్రహం వ్యక్తం చేశారు. వారిద్దరూ ఒకే దక్షిణాసియా బృందంలో ఉంటూ, పండుగలు కలిసి జరుపుకునే మంచి స్నేహితులని కౌల్ స్నేహితుడి తండ్రి ఒకరు తెలిపారు. 

ఈ విషాద ఘటనపై న్యూయార్క్ పోలీస్ డిపార్ట్‌మెంట్ దర్యాప్తు ప్రారంభించినట్లు అధికారులు వెల్లడించారు. ఉన్నత భవిష్యత్తు ఉన్న ఇద్దరు ఇలా అర్ధాంతరంగా మరణించడం అందరినీ కలచివేస్తోంది.