రాజస్థాన్ స్థానిక ఎన్నికల్లో వింత: బీజేపీ అభ్యర్థికి పోలైన ఓటు ఒక్కటే!

రాజస్థాన్ పట్టణ స్థానిక సంస్థల ఎన్నికల్లో ఓ ఆసక్తికర ఘటన చోటుచేసుకుంది. బీజేపీ తరఫున బరిలోకి దిగిన ఓ అభ్యర్థికి కేవలం ఒక్క ఓటు మాత్రమే పడటం ఇప్పుడు రాష్ట్రవ్యాప్తంగా చర్చనీయాంశమైంది. ఈ అనూహ్య ఫలితంతో సదరు అభ్యర్థి ఒక్కసారిగా వార్తల్లో నిలిచారు.

దిడ్వానా-కుచమన్ జిల్లాలోని పర్బత్‌సర్ మున్సిపాలిటీ పరిధిలో గల 13వ వార్డు నుంచి బీజేపీ అభ్యర్థిగా కైలాశ్‌చంద్ పోటీ చేశారు. సోమవారం వెలువడిన ఫలితాల్లో ఆయనకు కేవలం ఒకే ఒక్క ఓటు లభించినట్లు అధికారులు ధ్రువీకరించారు. కాగా, ఇదే వార్డులో కాంగ్రెస్ అభ్యర్థి హీనా ఖానమ్ 376 ఓట్లతో విజయం సాధించగా, స్వతంత్ర అభ్యర్థి రషీద్ ఖాన్ 195 ఓట్లతో రెండో స్థానంలో నిలిచారు.

ఈ విచిత్ర ఫలితంపై కైలాశ్‌చంద్ పీటీఐతో మాట్లాడుతూ, "నాకు కేవలం ఒక్క ఓటు మాత్రమే వచ్చింది. వాస్తవానికి నా ఓటు పక్కనే ఉన్న 12వ వార్డులో ఉంది. అయితే పార్టీ ఆదేశాల మేరకు నేను 13వ వార్డు నుంచి పోటీ చేశాను. ఆ వార్డుకు చెందిన ఎవరో ఒకరు నాకు ఓటు వేశారు" అని వెల్లడించారు. తన ఓటు కూడా తనకు వేసుకునే అవకాశం లేకపోవడంతోనే ఈ పరిస్థితి తలెత్తిందని ఆయన వివరణ ఇచ్చారు.

మొత్తం 25 వార్డులు ఉన్న పర్బత్‌సర్ మున్సిపాలిటీలో కాంగ్రెస్ 13 స్థానాలను కైవసం చేసుకోగా, బీజేపీ 12 స్థానాల్లో విజయం సాధించింది. రాజస్థాన్ రాష్ట్రవ్యాప్తంగా 309 పట్టణ స్థానిక సంస్థల్లోని 10,000కు పైగా కౌన్సిలర్ పదవులకు సంబంధించిన ఓట్ల లెక్కింపు ప్రక్రియ ప్రస్తుతం కొనసాగుతోంది.