ఇంగ్లాండ్‌తో ఓటమి.. ఆపై ఐసీసీ షాక్‌.. పాకిస్థాన్‌ పరిస్థితి మరింత దారుణం

వరల్డ్‌ టెస్ట్‌ ఛాంపియన్‌షిప్‌ (డబ్ల్యూటీసీ)లో పాకిస్థాన్‌కు భారీ ఎదురుదెబ్బ తగిలింది. ఇంగ్లాండ్‌తో మూడో టెస్టులో స్లో ఓవర్‌ రేట్‌ కారణంగా ఆ జట్టుపై అంతర్జాతీయ క్రికెట్‌ మండలి (ఐసీసీ) కఠిన చర్యలు తీసుకుంది. మ్యాచ్‌ ఫీజులో 50 శాతం జరిమానాతో పాటు ఏకంగా 11 డబ్ల్యూటీసీ పాయింట్ల కోత విధించింది.

బర్మింగ్‌హామ్‌లో జరిగిన మూడో టెస్టులో పాకిస్థాన్‌ నిర్ణీత సమయానికి 11 ఓవర్లు తక్కువగా వేసినట్లు తేలింది. టైమ్‌ సర్దుబాట్లను పరిగణనలోకి తీసుకున్న తర్వాత కూడా లోటు ఉండటంతో ఈ శిక్ష విధించారు. ఫలితంగా ఇప్పటికే డబ్ల్యూటీసీ పట్టికలో తొమ్మిదో స్థానంలో ఉన్న పాకిస్థాన్‌.. ఇప్పుడు పీసీటీ విషయంలో మరింత దిగజారింది.

ఇంగ్లాండ్‌తో సిరీస్‌ను 0-3తో కోల్పోయిన సమయంలో పాకిస్థాన్‌ పీసీటీ 14.81 శాతంగా ఉంది. తాజాగా 11 పాయింట్ల కోతతో అది ఏకంగా 4.63 శాతానికి పడిపోయింది. ప్రస్తుత డబ్ల్యూటీసీ సైకిల్‌లో తొమ్మిది మ్యాచ్‌లు ఆడిన పాకిస్థాన్‌ రెండింటిలో గెలిచి, ఏడు మ్యాచుల్లో ఓడింది. ఈ క్రమంలో మొత్తం 24 పాయింట్లు సాధించగా.. స్లో ఓవర్‌ రేట్‌ ఉల్లంఘనల కారణంగా 19 పాయింట్లు కోల్పోయింది.

ఇంతకుముందు బంగ్లాదేశ్‌తో ఢాకా టెస్టులోనూ స్లో ఓవర్‌ రేట్‌ కారణంగా పాకిస్థాన్‌ 8 పాయింట్లు కోల్పోయింది. ఇప్పుడు మరో 11 పాయింట్లు తగ్గడంతో ఆ జట్టు పరిస్థితి మరింత దారుణంగా మారింది.

డబ్ల్యూటీసీ పట్టికలో ఆస్ట్రేలియా 80 శాతం పీసీటీతో అగ్రస్థానంలో కొనసాగుతోంది. దక్షిణాఫ్రికా 75 శాతంతో రెండో స్థానంలో, న్యూజిలాండ్‌ 72.22 శాతంతో మూడో స్థానంలో ఉన్నాయి. బంగ్లాదేశ్‌ 55.56 శాతంతో నాలుగో స్థానంలో ఉండగా.. భారత్‌ 51.52 శాతంతో ఐదో స్థానంలో ఉంది. ఇంగ్లాండ్‌ 38.54 శాతంతో ఆరో స్థానంలో కొనసాగుతోంది.

పీసీటీ తగ్గడం అంటే డబ్ల్యూటీసీ ఫైనల్‌ రేసులో ఆ జట్టు అవకాశాలు బలహీనపడటం. పాకిస్థాన్‌కు ఇప్పుడు డబ్ల్యూటీసీ ఫైనల్‌ రేసు మరింత కష్టంగా మారింది. ఇప్పటికే తొమ్మిది మ్యాచ్ లలో ఏడు ఓటములు ఎదుర్కొన్న ఆ జట్టు.. మిగిలిన మ్యాచ్ లలో మెరుగైన ఫలితాలు సాధించాల్సిన పరిస్థితి ఏర్పడింది. ముఖ్యంగా స్లో ఓవర్‌ రేట్‌ కారణంగా పాయింట్లు కోల్పోకుండా జాగ్రత్త పడాల్సిన అవసరం ఉంది.