ఫ్యాన్స్‌పై రొనాల్డో ఫైర్.. వారిపై జీవితకాల నిషేధం విధించాలని డిమాండ్.. అస‌లేం జ‌రిగిందంటే!

సౌదీ ప్రో లీగ్‌లో చోటుచేసుకున్న ఒక అమానవీయ ఘటనపై పోర్చుగల్ ఫుట్‌బాల్ దిగ్గజం క్రిస్టియానో రొనాల్డో తీవ్ర ఆగ్రహం వ్యక్తం చేశాడు. చనిపోయిన ఒక ఆటగాడి పేరుతో నినాదాలు చేస్తూ మరో ఆటగాడిని మానసికంగా వేధించిన అభిమానులను కఠినంగా శిక్షించాలని, వారిని మళ్లీ స్టేడియంలోకి అడుగుపెట్టనీయకుండా జీవితకాలం నిషేధం విధించాలని డిమాండ్ చేశాడు.

అస‌లేం జ‌రిగిందంటే..!
సౌదీ అరేబియాలోని అల్ తవూన్ క్లబ్ స్టేడియంలో ఈ నెల‌ 12న అల్ హిలాల్, అల్ తవూన్ జట్ల మధ్య మ్యాచ్ జరిగింది. ఈ మ్యాచ్ సందర్భంగా అల్ హిలాల్ ఆటగాడు జోవా నెవెస్ ఫ్రీ-కిక్ తీసుకోబోతుండగా, ప్రత్యర్థి జట్టు అభిమానులు 'జోటా, జోటా, జోటా' అంటూ గట్టిగా అరవడం ప్రారంభించారు. ఈ ఘటనకు సంబంధించిన వీడియో సోషల్ మీడియాలో వైరల్‌గా మారింది.

గతేడాది జులైలో పోర్చుగల్ ఫుట్‌బాలర్ డియోగో జోటా (28), అతని సోదరుడు ఆండ్రీ సిల్వా (25) స్పెయిన్‌లో జరిగిన కారు ప్రమాదంలో దుర్మరణం పాలయ్యారు. జోటా, నెవెస్ ఇద్దరూ మంచి స్నేహితులు. ఈ నేపథ్యంలోనే అభిమానులు నెవెస్‌ను రెచ్చగొట్టేందుకు ఉద్దేశపూర్వకంగానే జోటా పేరుతో నినాదాలు చేశారు. 

అభిమానుల అరుపులకు నెవెస్ మొదట చప్పట్లు కొట్టి, ఆ తర్వాత ఆకాశం వైపు చూపిస్తూ, తన కళ్లను చూపిస్తూ సైగలు చేశాడు. మ్యాచ్ అనంతరం మీడియాతో మాట్లాడుతూ.. "వాళ్లు చేసిన పని తర్వాత మళ్లీ ప్రార్థనలకు వెళ్లరని ఆశిస్తున్నాను" అంటూ తన ఆవేదనను వ్యక్తం చేశాడు.

ఈ ఘటనపై రొనాల్డో ఇన్‌స్టాగ్రామ్‌లో స్పందిస్తూ తీవ్రంగా ఖండించాడు. "ఇలాంటి అభిమానుల ప్రవర్తనపై లీగ్ యాజమాన్యం తప్పనిసరిగా చర్యలు తీసుకోవాలి. వారిని కఠినంగా శిక్షించాలి. ఇది ఇక ఫుట్‌బాల్ కాదు, దీనికి కొన్ని హద్దులు ఉండాలి. ఇలా ప్రవర్తించిన వారిని మళ్లీ స్టేడియంలోకి అడుగుపెట్టనివ్వకూడదు" అని రొనాల్డో ఘాటుగా వ్యాఖ్యానించాడు.

జోటా, నెవెస్ మధ్య మైదానం లోపల, బయట బలమైన స్నేహబంధం ఉంది. కేవలం నాలుగు నెలల తేడాతో జన్మించిన వీరిద్దరూ పోర్చుగల్ యూత్ జట్టులో, ఆ తర్వాత పోర్టో, వోల్వర్‌హాంప్టన్ వాండరర్స్ క్లబ్‌లకు కలిసి ఆడారు. ఇంతటి సన్నిహిత స్నేహితుడి మరణాన్ని అడ్డం పెట్టుకుని అభిమానులు ప్రవర్తించిన తీరుపై క్రీడా ప్రపంచం నుంచి తీవ్ర విమర్శలు వెల్లువెత్తుతున్నాయి.