చంద్రబాబుది కుటుంబాలను విడదీసే చరిత్ర.. బొత్స కుటుంబాన్ని ఎవరూ టచ్ చేయలేరు: గుడివాడ అమర్నాథ్
- బొత్స ఒక రాజకీయ విశ్వవిద్యాలయం అన్న గుడివాడ అమర్నాథ్
- సర్పంచ్‌ల నుంచి ఎమ్మెల్యేల వరకు ఎంతోమందిని గెలిపించిన చరిత్ర ఆయనదని ప్రశంస
- జిల్లాలోని పార్టీ శ్రేణులు 'బొత్స 2.0' గురించి ఎదురుచూస్తున్నాయని వ్యాఖ్య
ఆంధ్రప్రదేశ్ ముఖ్యమంత్రి చంద్రబాబుపై వైసీపీ నేత, మాజీ మంత్రి గుడివాడ అమర్నాథ్ తీవ్రస్థాయిలో విమర్శలు గుప్పించారు. చంద్రబాబుకు కుటుంబాలను విడదీసే సుదీర్ఘ చరిత్ర ఉందని ఆయన తీవ్ర వ్యాఖ్యలు చేశారు. ఎన్ని కుట్రలు చేసినా శాసనమండలి ప్రతిపక్ష నేత బొత్స సత్యనారాయణ కుటుంబాన్ని మాత్రం ఎవరూ ఏమీ చేయలేరని వ్యాఖ్యానించారు. విజయనగరంలో నిర్వహించిన వైసీపీ జిల్లా సర్వసభ్య సమావేశంలో బొత్స సత్యనారాయణ, గుడివాడ అమర్నాథ్‌తో పాటు పలువురు ముఖ్య నాయకులు పాల్గొన్నారు. ఈ సందర్భంగా మాట్లాడిన అమర్నాథ్... బొత్స సత్యనారాయణను ఒక 'రాజకీయ విశ్వవిద్యాలయం' అని కొనియాడారు. సర్పంచ్‌ల నుంచి ఎమ్మెల్యేల వరకు ఎంతోమందిని గెలిపించిన గొప్ప చరిత్ర ఆయన సొంతమని ప్రశంసించారు.
విజయనగరం జిల్లాలోని వైసీపీ శ్రేణులంతా 'బొత్స 2.0' నాయకత్వం కోసం ఆత్రుతగా ఎదురుచూస్తున్నాయని అమర్నాథ్ అన్నారు. జగన్ రాజకీయ పార్టీని స్థాపించినప్పుడు బడా నాయకులను నమ్ముకుని పెట్టలేదని, కేవలం వైఎస్సార్ అభిమానులను, సామాన్య ప్రజలనే నమ్ముకుని ముందుకు సాగారని గుర్తుచేశారు.
ప్రస్తుతం మంత్రి నారా లోకేశ్ చుట్టూ అధికారులు తిరుగుతున్నారని చంద్రబాబు భావిస్తున్నారని... కానీ అధికారంలో ఉన్నప్పుడు గాడిద కూడా గుర్రంలాగే కనిపిస్తుందని వ్యాఖ్యానించారు. రేపటి రోజున అదే అధికారులు లోకేశ్ చుట్టూ తిరిగిన సమయాన్ని గుర్తుచేసుకుని ఆవేదన చెందే రోజు వస్తుందని ఎద్దేవా చేశారు. రాష్ట్రవ్యాప్తంగా పార్టీ కార్యకర్తలకు, నాయకులకు వైసీపీ ఎల్లవేళలా అండగా ఉంటుందని గుడివాడ అమర్నాథ్ ధైర్యం చెప్పారు.
మరోవైపు, బొత్స సత్యనారాయణ మేనల్లుడు చిన్న శ్రీను అంశాన్ని అమర్నాథ్ ప్రస్తావించినప్పుడు... వేదికపై ఉన్న బొత్స సత్యనారాయణ తీవ్ర భావోద్వేగానికి లోనై మరోసారి కన్నీరు పెట్టుకున్నారు.
