గురుగ్రామ్‌కు చెందిన ఒక ఇంటి పనిమనిషి నెలవారీ సంపాదన, ఆమె అనుసరిస్తున్న ఆర్థిక ప్రణాళిక చూసి ఓ కార్పొరేట్ ఎగ్జిక్యూటివ్ విస్మయానికి గురయ్యారు. ఆ వివరాలను ఆయన సోషల్ మీడియాలో పంచుకోవడంతో ప్రస్తుతం ఈ వార్త వైరల్‌గా మారింది. శివ మిట్టల్ అనే ఎగ్జిక్యూటివ్ ఇంట్లో పనిచేసే సదరు మహిళ, సుమారు ఐదారు ఇళ్లలో పనిచేస్తూ నెలకు రూ. 60,000 వరకు ఆర్జిస్తున్నారు.

ఆమె తన ఆదాయాన్ని అత్యంత ప్రణాళికాబద్ధంగా వెచ్చిస్తున్నారు. నెలకు రూ. 10,000 అద్దె చెల్లిస్తూనే, తన కుమార్తెను ఒక ప్రైవేట్ పాఠశాలలో చదివిస్తున్నారు. అంతేకాకుండా, తన స్వగ్రామంలో రూ. 6 లక్షల విలువైన స్థలాన్ని కొనుగోలు చేసి, దానికి సంబంధించిన ఈఎంఐలను క్రమం తప్పకుండా చెల్లిస్తున్నారు. అనవసర వ్యయాలకు దూరంగా ఉంటూ, తన కుమార్తె భవిష్యత్తుకే అత్యంత ప్రాధాన్యతనిస్తున్నారు. ప్రతిరోజూ ఉదయం 7 గంటలకే విధులకు హాజరయ్యే ఆమె, నెలకు కేవలం మూడు నుంచి నాలుగు రోజులు మాత్రమే సెలవు తీసుకుంటారు.

ఈ విషయాలను గమనించిన శివ మిట్టల్, ఆమె ఆర్థిక క్రమశిక్షణను ప్రశంసించారు. ఎలాంటి కార్పొరేట్ భద్రతా వలయం (ఇన్సూరెన్స్, పీఎఫ్ వంటివి) లేకపోయినా, స్పష్టమైన ప్రాధాన్యతలతో ఆమె డబ్బును నిర్వహిస్తున్న తీరు అద్భుతమన్నారు. చాలామంది కార్పొరేట్ ఉద్యోగులు జీతం పెరగగానే కార్లు, గ్యాడ్జెట్ల వంటి వాటిపై ఈఎంఐలు పెట్టుకుంటారని, కానీ ఈమె మాత్రం భవిష్యత్తు కోసం ఆస్తిని కూడబెడుతున్నారని ఆయన పోల్చారు.

ఈ పోస్ట్‌పై సోషల్ మీడియాలో మిశ్రమ స్పందనలు వస్తున్నాయి. కొందరు ఆమెను స్ఫూర్తిగా తీసుకుంటుండగా, మరికొందరు గురుగ్రామ్‌లో జీవన వ్యయం చాలా ఎక్కువని, ఇక్కడ పోలిక సరికాదని అభిప్రాయపడుతున్నారు.