బ్యాట్ నాకు క్రీడా పరికరం మాత్రమే కాదు: సచిన్ ఎమోషనల్ పోస్ట్

క్రికెట్ దేవుడు సచిన్ టెండూల్కర్ తన క్రీడా జీవితంలోని మధుర జ్ఞాపకాలను సోషల్ మీడియా వేదికగా పంచుకున్నాడు. తన విజయాల్లో కీలక పాత్ర పోషించిన క్రికెట్ బ్యాట్‌తో తనకున్న ప్రత్యేక అనుబంధాన్ని గుర్తుచేసుకుంటూ పలు ఆసక్తికర విషయాలను వెల్లడించాడు. బ్యాట్ అనేది తనకు కేవలం ఒక క్రీడా పరికరం మాత్రమే కాదని పేర్కొన్నాడు.

"నా దృష్టిలో బ్యాట్ అనేది కేవలం ఒక పరికరం కాదు. దానిని చేతుల్లోకి తీసుకున్నప్పుడు ఎలాంటి అనుభూతి కలుగుతుందో నాకు స్పష్టంగా తెలుసు. అందుకే అతి చిన్న అంశాలపై కూడా నేను ప్రత్యేక శ్రద్ధ వహించేవాడిని" అని సచిన్ తన పోస్టులో పేర్కొన్నాడు. అవసరమైనప్పుడు తన వద్ద ఉన్న కార్పెంటరీ కిట్‌ను బయటకు తీసి, బ్యాట్‌కు స్వయంగా మెరుగులు దిద్దుకునేవాడినని గుర్తుచేసుకున్నాడు. తనకు నచ్చిన ఆకృతి, సరైన పట్టు లభించే వరకు దానిపై స్వయంగా పని చేసేవాడినని వివరించాడు.

ఈ క్రమంలో గడిపిన చిన్న చిన్న క్షణాలు తనకు ఎంతో మధురంగా గుర్తున్నాయని సచిన్ తెలిపాడు. "నిజానికి ఆ జ్ఞాపకాలు కేవలం బ్యాట్‌కు సంబంధించినవి మాత్రమే కాదు, ఆ ప్రక్రియ ద్వారా ఆ బ్యాట్‌ను నా సొంతం చేసుకోవడానికి సంబంధించినవి" అంటూ తన పోస్టును ముగించాడు.