నాగార్జున వర్సిటీ గోల్డెన్ జూబ్లీకి ప్రత్యేక గుర్తింపు.. పోస్టల్ స్టాంపును ఆవిష్కరించిన నారా లోకేశ్

ఆచార్య నాగార్జున యూనివర్సిటీ (ఏఎన్‌యూ) 50 ఏళ్ల ప్రస్థానానికి గుర్తుగా రూపొందించిన ప్రత్యేక పోస్టల్ స్టాంప్‌ను రాష్ట్ర ఐటీ, విద్యాశాఖ మంత్రి నారా లోకేశ్ ఆవిష్కరించారు. గురువారం సచివాలయంలో ఈ కార్యక్రమం జరిగింది. యూనివర్సిటీ స్వర్ణోత్సవ (గోల్డెన్ జూబ్లీ) వేడుకలు చిరకాలం గుర్తుండిపోయేలా ఈ ప్రత్యేక స్టాంప్‌ను రూపొందించినట్లు అధికారులు తెలిపారు.

ఈ సందర్భంగా మంత్రి నారా లోకేశ్ మాట్లాడుతూ, ఆచార్య నాగార్జున యూనివర్సిటీ గోల్డెన్ జూబ్లీ వేడుకలను పురస్కరించుకుని ఈ ప్రత్యేక స్టాంప్‌ను ఆవిష్కరించినట్లు తెలిపారు. ఈ విషయాన్ని ఆయన తన సోషల్ మీడియా ఖాతా ద్వారా కూడా పంచుకున్నారు. 

యూనివర్సిటీ 50 ఏళ్ల ప్రస్థానంలో సాధించిన విజయాలు, విద్యారంగానికి అందించిన సేవలను ఈ సందర్భంగా అధికారులు మంత్రికి వివరించారు. స్వర్ణోత్సవాల నేపథ్యంలో చేపట్టనున్న ప్రత్యేక కార్యక్రమాల గురించి కూడా తెలియజేశారు.

ఈ కార్యక్రమంలో విద్యాశాఖ ముఖ్య కార్యదర్శి శ్యామలరావు, ఉన్నత విద్యామండలి కమిషనర్ నారాయణ భరత్ గుప్తా, ఆచార్య నాగార్జున యూనివర్సిటీ వైస్ ఛాన్సలర్ ప్రొఫెసర్ కె. గంగాధర రావు, రెక్టార్ ఆర్. శివరామ్ ప్రసాద్, రిజిస్ట్రార్ జి. సింహాచలం సహా పలువురు ఉన్నతాధికారులు పాల్గొన్నారు.