'ది ప్యారడైజ్' చిత్రీకరణ పూర్తి.. నాని కొత్త పోస్టర్ రిలీజ్!

నేచురల్ స్టార్ నాని హీరోగా, యువ దర్శకుడు శ్రీకాంత్ ఓదెల తెరకెక్కిస్తున్న భారీ యాక్షన్ ఎంటర్‌టైనర్ 'ది ప్యారడైజ్' షూటింగ్ పూర్తి చేసుకుంది. 'దసరా' వంటి బ్లాక్‌బస్టర్ విజయం తర్వాత వీరిద్దరి కలయికలో వస్తున్న రెండో సినిమా కావడంతో దీనిపై ప్రేక్షకుల్లో, ఇండస్ట్రీ వర్గాల్లో భారీ అంచనాలు నెలకొన్నాయి. చిత్ర యూనిట్ సినిమా మొత్తం చిత్రీకరణను విజయవంతంగా ముగించినట్లు సమాచారం. ప్రస్తుతం పోస్ట్-ప్రొడక్షన్ పనులు శరవేగంగా జరుగుతున్నాయి.

ఎస్‌ఎల్‌వి సినిమాస్ బ్యానర్‌పై సుధాకర్ చెరుకూరి నిర్మిస్తున్న ఈ చిత్రాన్ని సెప్టెంబర్ 24న ప్రపంచవ్యాప్తంగా విడుదల చేయనున్నారు. అంతకంటే ఒకరోజు ముందుగా, అంటే సెప్టెంబర్ 23న ప్రీమియర్ షోలు ప్రదర్శించనున్నారు. గురువారం చిత్ర యూనిట్ నానికి సంబంధించిన ఒక కొత్త పోస్టర్‌ను విడుదల చేసి అభిమానుల్లో ఉత్సాహాన్ని నింపింది. ఈ పోస్టర్‌లో నాని పొడవాటి జుట్టు, గుబురు గడ్డంతో పీరియడ్ రగ్డ్ లుక్‌లో కనిపిస్తున్నారు. చేతిలో భారీ తుపాకీ పట్టుకుని, తీవ్రమైన చూపులతో ఆకట్టుకుంటున్నారు. దర్శకుడు శ్రీకాంత్ ఓదెల తన మొబైల్ ఫోన్ నుంచి తీసిన స్క్రీన్‌షాట్‌ను పోస్టర్‌గా విడుదల చేసినట్టు తెలుస్తోంది.

ఇప్పటికే విడుదలైన 'ది ప్యారడైజ్' టీజర్ సినిమాపై అంచనాలను అమాంతం పెంచేసింది. పీడిత ప్రజల తిరుగుబాటు నేపథ్యంలో ఈ సినిమా సాగనుందని టీజర్ స్పష్టం చేసింది. "ఇకపై ఈ నేల ఎవరిది?", "అసహ్యించుకున్న నలుపే మా జెండా.. కాకి మా చిహ్నం" వంటి సంభాషణలు, రక్తపాతంతో కూడిన యాక్షన్ సన్నివేశాలు సినిమా ఎంత తీవ్రంగా ఉండబోతోందో సూచించాయి. ఈ చిత్రంలో సీనియర్ నటుడు మోహన్ బాబు ప్రతినాయకుడి పాత్రలో కనిపించనున్నట్లు తెలుస్తోంది.

వాస్తవానికి ఈ సినిమాను మొదట మార్చి 26న, ఆ తర్వాత ఆగస్టు 21న విడుదల చేయాలని భావించినప్పటికీ, పలు కారణాలతో సెప్టెంబర్ 24కి వాయిదా పడింది. ఎట్టకేలకు షూటింగ్ పూర్తి కావడంతో, ఇక ప్రమోషన్ల జోరు పెంచి సినిమాను ప్రేక్షకుల్లోకి బలంగా తీసుకెళ్లేందుకు యూనిట్ సిద్ధమవుతోంది.