ధోనీ భాయ్ వికెట్ తీశాను.. ఆ ఆనందమే వేరు: కార్తిక్ చద్ధా

ఐపీఎల్ లాంటి మెగా టోర్నీలో దిగ్గజ ఆటగాళ్లతో డ్రెస్సింగ్ రూమ్ పంచుకోవడమే ఒక యువ క్రికెటర్‌కు గొప్ప అనుభూతి. అలాంటిది, ఏకంగా 'కెప్టెన్ కూల్' మహేంద్ర సింగ్ ధోనీ వికెట్ తీస్తే ఆ ఆనందాన్ని మాటల్లో వర్ణించలేం. జలంధర్‌కు చెందిన యువ లెగ్ స్పిన్నర్ కార్తిక్ చద్ధా సరిగ్గా అలాంటి మధుర క్షణాన్నే ఆస్వాదించాడు. ఐపీఎల్ 2025 సీజన్‌లో చెన్నై సూపర్ కింగ్స్ (సీఎస్కే) జట్టుకు నెట్ బౌలర్‌గా సేవలందించిన కార్తిక్, చెపాక్‌లో జరిగిన ఒక ఇంట్రా-స్క్వాడ్ మ్యాచ్‌లో ధోనీని ఔట్ చేశాడు. ఆ సంఘటనే తనలో అపారమైన ఆత్మవిశ్వాసాన్ని నింపిందని అతను చెబుతున్నాడు.

సీఎస్కే నుంచి పిలుపు వచ్చినప్పుడు మొదట నమ్మలేకపోయానని కార్తిక్ అన్నాడు. "సీఎస్కే క్యాంపులో చేరమని నాకు ఫోన్ వచ్చినప్పుడు, ఆ క్షణం నమ్మశక్యంగా అనిపించలేదు. అక్కడికి వెళ్లాక, ధోనీ భాయ్ లాంటి దిగ్గజంతో డ్రెస్సింగ్ రూమ్ పంచుకోవడం నాకు చాలా పెద్ద విషయం" అని ఐఏఎన్ఎస్ వార్తా సంస్థతో మాట్లాడుతూ కార్తీక్ తెలిపాడు. జట్టుతో కలిసి ప్రాక్టీస్ చేయడం, మ్యాచ్‌లు ఆడటం మొదలుపెట్టాక తనలో నమ్మకం పెరిగిందని చెప్పాడు. "జట్టులో అంతర్గతంగా నిర్వహించిన మ్యాచ్‌లలో నేను బాగా బౌలింగ్ చేశాను. అప్పుడే నేను ఈ స్థాయికి చెందినవాడినని నమ్మడం మొదలుపెట్టాను. నా ఆత్మవిశ్వాసం రెట్టింపు అయ్యింది" అని వివరించాడు.

ధోనీని ఔట్ చేసిన క్షణాన్ని గుర్తుచేసుకుంటూ, "ఒక ఇంట్రా-స్క్వాడ్ మ్యాచ్‌లో నేను నాలుగు వికెట్లు పడగొట్టాను. అందులో ధోనీ భాయ్ వికెట్ కూడా ఉంది. అది సాధారణ ప్రాక్టీస్ గేమే అయినా, ధోనీని ఔట్ చేయగలిగాను. ఆ మ్యాచ్‌లో నేను పరుగులు కూడా ఇచ్చాను, కానీ ధోనీ భాయ్‌ని ఔట్ చేసిన ఆనందమే వేరు" అని కార్తిక్ ఆనందంగా చెప్పాడు.

అయితే, ఈ స్థాయికి చేరుకోవడానికి కార్తిక్ ప్రయాణం అంత సులువుగా సాగలేదు. ఎన్నో గాయాలు అతడిని వెనక్కి లాగాయి. గత ఏడాది మహారాజా రంజిత్ కప్‌లో వేలికి ఫ్రాక్చర్ అవ్వగా, షేర్-ఏ-పంజాబ్ లీగ్‌కు ముందు చీలమండ గాయంతో బాధపడ్డాడు. "చాలా కాలంగా ఫిట్‌నెస్ సమస్యలతో ఇబ్బంది పడ్డాను. మంచి ఫామ్‌లో ఉన్నప్పుడు గాయపడటం చాలా నిరుత్సాహపరిచింది. ఒకటిన్నర నెల పాటు ఆటకు దూరమయ్యాను. కానీ, పట్టుదలతో కోలుకుని మళ్లీ మైదానంలోకి అడుగుపెట్టాను" అని తన పోరాటాన్ని వివరించాడు. తిరిగివచ్చాక షేర్-ఏ-పంజాబ్ లీగ్‌లో భారత కెప్టెన్ శుభ్‌మన్ గిల్‌ వికెట్‌ను కూడా తీసి తన సత్తా చాటాడు.

భారత జట్టులోకి రావడం ఎంత కష్టమో, వచ్చాక వచ్చే విమర్శలను తట్టుకోవడం అంతకంటే పెద్ద సవాల్ అని కార్తిక్ అభిప్రాయపడ్డాడు. "సోషల్ మీడియా పెరిగాక, విరాట్ కోహ్లీ లాంటి ఆటగాడికే విమర్శలు, ద్వేషం తప్పడం లేదు. దేశం కోసం అద్భుతాలు చేసిన అతడికే అలాంటి పరిస్థితి ఉంటే, ఆ ఒత్తిడిని ఎలా తట్టుకోవాలన్నదే అసలైన సవాల్. అందుకే మైండ్‌సెట్ చాలా ముఖ్యం" అని అన్నాడు. భవిష్యత్తు గురించి ఎక్కువగా ఆలోచించకుండా, వర్తమానంలో లభించిన అవకాశాలపైనే దృష్టి పెడతానని, ప్రతిరోజూ అత్యుత్తమ ప్రదర్శన ఇవ్వడమే తన లక్ష్యమని కార్తిక్ చద్ధా స్పష్టం చేశాడు.