విజయవాడ-తిరుపతి ఇక గంటలోనే.. అందుబాటులోకి కొత్త విమాన సర్వీస్.. తక్కువ ధరకే టికెట్లు

తిరుమల శ్రీవారి భక్తులకు, ముఖ్యంగా విజయవాడ నుంచి ప్రయాణించే వారికి ఒక శుభవార్త. విజయవాడ, తిరుపతి నగరాల మధ్య ప్రయాణ సమయాన్ని గణనీయంగా తగ్గించేందుకు కొత్త విమాన సర్వీసు అందుబాటులోకి వచ్చింది. 'ఫ్లై 91' విమానయాన సంస్థ ఈ రెండు నగరాల మధ్య నేరుగా విమాన సేవలను ప్రారంభించింది. దీనివల్ల సాధారణంగా రోడ్డు మార్గంలో పట్టే 7 నుంచి 8 గంటల ప్రయాణ సమయం కేవలం గంటకు పరిమితం కానుంది.

విమాన సమయాలు.. టికెట్ ధరలు
ఈ కొత్త సర్వీసు వారానికి నాలుగు రోజుల పాటు అందుబాటులో ఉంటుంది. ప్రతిరోజూ ఉదయం 8:05 గంటలకు తిరుపతిలో బయలుదేరిన విమానం, 9:15 గంటలకు విజయవాడ అంతర్జాతీయ విమానాశ్రయానికి చేరుకుంటుంది. తిరిగి ఉదయం 9:45 గంటలకు విజయవాడలో బయలుదేరి, 10:50 గంటలకు తిరుపతికి చేరుకుంటుంది. ఈ ప్రయాణానికి టికెట్ ధర సుమారు రూ.3,000 నుంచి రూ.3,500 మధ్య ఉంటుందని ఫ్లై 91 సంస్థ ప్రతినిధులు తెలిపారు. 

ప్రయాణికులకు టీటీడీ ప్రత్యేక సౌకర్యం
ఈ విమానంలో ప్రయాణించే భక్తులకు టీటీడీ మరో అద్భుతమైన అవకాశం కల్పిస్తోంది. విమాన ప్రయాణికులు తిరుపతి విమానాశ్రయంలోనే శ్రీవారి దర్శన టికెట్లు పొందే సౌకర్యం ఉంది. ఎయిర్‌పోర్టులో ప్రత్యేకంగా ఏర్పాటు చేసిన టీటీడీ కౌంటర్‌లో తమ విమానం బోర్డింగ్ పాస్, ఆధార్ కార్డు చూపించి శ్రీవాణి ట్రస్ట్ దర్శన టికెట్లను కొనుగోలు చేయవచ్చు. 

ఇందుకోసం శ్రీవాణి ట్రస్ట్‌కు రూ.10,000 విరాళం, దర్శనం టికెట్ కోసం రూ.500 చెల్లించాల్సి ఉంటుంది. టీటీడీ ఈ కోటా కింద ప్రతిరోజూ 200 టికెట్లను అందుబాటులో ఉంచుతోంది. తక్కువ సమయంలో ప్రయాణం, ఎయిర్‌పోర్టులోనే దర్శనం టికెట్లు లభించే ఈ సదుపాయం భక్తులకు ఎంతో సౌకర్యవంతంగా మారనుంది. తక్కువ ధర, వేగవంతమైన ప్రయాణంతో ఈ సర్వీసుకు మంచి స్పందన వస్తుందని అంచనా వేస్తున్నారు.