వందేమాతరంపై కాంగ్రెస్ వర్సెస్ నేషనలిస్ట్ కాంగ్రెస్.. కారణమిదే

జమ్ముకాశ్మీర్‌లో అధికారంలో ఉన్న నేషనల్ కాన్ఫరెన్స్ (ఎన్సీ), కాంగ్రెస్ కూటమిలో విభేదాలు మరోసారి బహిర్గతమయ్యాయి. 'వందేమాతరం' గీతాలాపన విషయంలో తలెత్తిన ఈ వివాదం, కూటమిలోని ఆధిపత్య పోరుకు నిదర్శనమని రాజకీయ విశ్లేషకులు అభిప్రాయపడుతున్నారు.

ఇటీవల శ్రీనగర్‌లో నిర్వహించిన అంతర్జాతీయ ఫిల్మ్ ఫెస్టివల్‌లో ముఖ్యమంత్రి ఒమర్ అబ్దుల్లా, ఆయన తండ్రి ఫరూక్ అబ్దుల్లా కేంద్ర ప్రభుత్వ నూతన నిబంధనల మేరకు ఆరు చరణాల పూర్తి 'వందేమాతరం' గీతాన్ని ఆలపిస్తున్న సమయంలో గౌరవసూచకంగా నిలబడ్డారు. అయితే, దీనిపై కాంగ్రెస్ పార్టీ అభ్యంతరం వ్యక్తం చేసింది. 1937 నాటి పార్టీ తీర్మానం ప్రకారం వందేమాతరంలోని తొలి రెండు చరణాలను మాత్రమే ఆలపించాలని, మిత్రపక్షాలు కూడా ఇదే విధానాన్ని అనుసరించాలని కాంగ్రెస్ ప్రధాన కార్యదర్శి కేసీ వేణుగోపాల్ సూచించారు.

కాంగ్రెస్ సూచనను నేషనల్ కాన్ఫరెన్స్ తోసిపుచ్చింది. పార్లమెంటు చట్టం ప్రకారం జాతీయ గీతాలను గౌరవించడం తమ రాజ్యాంగబద్ధమైన విధి అని, దీనికి పార్టీల సిద్ధాంతాలతో సంబంధం లేదని ఎన్సీ అధికార ప్రతినిధి తన్వీర్ సాదిక్ స్పష్టం చేశారు.

అయితే, ఈ రెండు పార్టీల మధ్య వివాదం కేవలం వందేమాతర గీతానికి పరిమితం కాలేదని విశ్లేషకులు భావిస్తున్నారు. 2024 ఎన్నికల్లో ఎన్సీ 42 స్థానాల్లో విజయం సాధించగా, కాంగ్రెస్‌ కేవలం 6 స్థానాలకే పరిమితమైంది. దీంతో కూటమిలో తమదే పైచేయి అని నిరూపించుకునేందుకు ఎన్సీ ప్రయత్నిస్తోంది. 

గతంలో కాంగ్రెస్ చేపట్టిన 'ఓటు చోరీ' ప్రచారం, రాష్ట్ర హోదాపై ఆందోళనలు, రాజ్యసభ సీట్ల కేటాయింపు వంటి అంశాల్లోనూ ఉభయ పార్టీల మధ్య భిన్నాభిప్రాయాలు వ్యక్తమయ్యాయి. 1987లో కాంగ్రెస్‌తో పొత్తు పెట్టుకోవడం వల్ల తమ ప్రాంతీయ అస్తిత్వం దెబ్బతిన్నదనే భావన ఎన్సీ శ్రేణుల్లో బలంగా ఉంది. ఈ చారిత్రక కారణాల వల్లే కాంగ్రెస్ ఆధిపత్యాన్ని ఎన్సీ నాయకత్వం గట్టిగా వ్యతిరేకిస్తున్నట్లు కనిపిస్తోంది.