యశ్ 'టాక్సిక్'కు ఊహించ‌ని షాక్.. 150 కోట్ల నుంచి 30 కోట్లకు పడిపోయిన ఓటీటీ డీల్?

కన్నడ రాకింగ్ స్టార్ యశ్‌ హీరోగా, గీతూ మోహన్‌దాస్ దర్శకత్వంలో వచ్చిన పాన్ ఇండియా చిత్రం ‘టాక్సిక్: ఎ ఫెయిరీ టేల్ ఫర్ గ్రోన్-అప్స్’. ‘కేజీఎఫ్ 2’ లాంటి ఇండస్ట్రీ హిట్ తర్వాత యశ్‌ నటించిన సినిమా కావడంతో దీనిపై దేశవ్యాప్తంగా భారీ అంచనాలు నెలకొన్నాయి. అయితే, థియేటర్లలో ఈ సినిమా ఆశించిన స్థాయిలో విజయం సాధించలేకపోయింది. ఈ ప్రభావం ఇప్పుడు సినిమా డిజిటల్ స్ట్రీమింగ్ హక్కులపై తీవ్రంగా పడినట్లు సినీ వర్గాల్లో చర్చ జరుగుతోంది. విడుదలకు ముందు కోట్లు కుమ్మరించేందుకు సిద్ధపడిన ఓటీటీ సంస్థలు, ఇప్పుడు ముఖం చాటేస్తున్నాయని సమాచారం.

విడుదలకు ముందు ‘టాక్సిక్’ సినిమాకున్న హైప్‌ను క్యాష్ చేసుకునేందుకు ఓ ప్రముఖ ఓటీటీ ప్లాట్‌ఫామ్ డిజిటల్ హక్కుల కోసం ఏకంగా రూ.150 కోట్లు ఆఫర్ చేసినట్లు ప్రచారం జరిగింది. యశ్‌ క్రేజ్, సినిమాలో స్టార్ హీరోయిన్లు, బోల్డ్ కంటెంట్‌తో కూడిన టీజర్ వంటి అంశాలు ఈ భారీ ఆఫర్‌కు కారణంగా నిలిచాయి. అయితే, థియేటర్లలో సినిమా బ్లాక్‌బస్టర్ అయితే డిజిటల్ రైట్స్ విలువ రూ.200 కోట్లకు పైగా పలుకుతుందని భావించిన నిర్మాతలు ఆ ఆఫర్‌ను తిరస్కరించినట్లు అప్పట్లో వార్తలు వచ్చాయి.

కానీ, బాక్సాఫీస్ వద్ద సినిమా ఫలితం తారుమారు కావడంతో ఇప్పుడు ఓటీటీ లెక్కలు పూర్తిగా మారిపోయాయి. తాజా సమాచారం ప్రకారం ప్రముఖ ఓటీటీ సంస్థ జీ5 ఈ సినిమా డిజిటల్ హక్కుల కోసం కేవలం రూ.30 కోట్లు మాత్రమే ఆఫర్ చేసినట్లు ట్రేడ్ వర్గాల్లో వినిపిస్తోంది. విడుదలకు ముందు వచ్చిన ఆఫర్‌తో పోలిస్తే ఇది దాదాపు ఐదో వంతు మాత్రమే. సినిమా ఫలితం ఓటీటీ మార్కెట్‌ను ఎంతలా ప్రభావితం చేస్తుందో చెప్పడానికి ఇదే నిదర్శనమని విశ్లేషకులు అభిప్రాయపడుతున్నారు. అయితే, ఈ రూ.150 కోట్ల ఆఫర్, ప్రస్తుత రూ.30 కోట్ల డీల్‌పై చిత్రబృందం నుంచి అధికారిక ప్రకటన రావాల్సి ఉంది.

మరోవైపు, ఈ సినిమాకు ‘ఏ’ సర్టిఫికెట్ లభించడం శాటిలైట్ హక్కుల విషయంలో కొత్త సమస్యలు తెచ్చిపెట్టింది. బోల్డ్ కంటెంట్ కారణంగా సినిమాను యథాతథంగా టీవీలో ప్రసారం చేయడం కష్టం. అందుకే, కుటుంబ ప్రేక్షకుల కోసం కొన్ని సన్నివేశాలను తొలగించి లేదా మార్పులు చేసి, ప్రత్యేకంగా ఓ వెర్షన్‌ను సిద్ధం చేయాలని మేకర్స్ భావిస్తున్నట్లు తెలుస్తోంది. అవసరమైతే ఓటీటీ కోసం కూడా మరో వెర్షన్‌ను రూపొందించే ఆలోచనలో ఉన్నట్లు సమాచారం.